SIS-ip kina siulittaasunngussanersoq apeqquserpaat

Siumumi siulittaasussatut qinigassanngortinnissaq unnuaru unnuaqeqqanut killeqarpoq. Pingasut maannamut qinigassanngortipput, tassa maanna siulittaasuusoq, Hans Enoksen, Aningaasaqarnermut nunanullu allanut tunngassuteqartunut Naalakkersuisoq, Aleqa Hammond, aamma Ammassallup Kommuneani borgmesteri, Inatsisartunullu ilaasortaq, Vittus Mikaelsen.
januaarip 06-at 2008 13:25

Siumup Inuusuttaasa siulittaasussatut kina tapersersussanerlugu suli aalajanginngilaat, SIS-ip siulersuisuuneri oqarasuaatikkut ippassaq ataatsimiipput, tassanilu oqaluuseraat Aleqa Hammondip qinigassanngortinnera tapersersinnaanagu.

Siumup Inuusuttaasa kalaalinngorsaaneq tamakkiisumik tapersersorpaat, taamaammat Aleqa Hammondip Siumumi siulittaasumut qinigassanngortinnera tapersersorsinnaanagu tusagassiutinut allapput.

Tamatumunnga pissutaanerarpaat Aleqa Hammond kalaalinngorsaanermut akerliusutut nipilimmik ippassigamikkunni Radioavisimut oqarsimammat.

Siumup Inuusuttai aamma allapput inummik ataasiinnarmik ukiorpassuarni issiatitaqartarneq apeqqusernartuutillugu, politikkikkut nutarsaajuarneq tassuuna killilerneqarsinnaammat.

-Kalaalinngorsaaneq Siumup Inuusuttaasa tamakkiisumik tapersersorpaat, taamaammat siulittaasunngortussaq tassaasariaqarpoq kalaalinngorsaanermik tapersersuilluinnartoq, Siumup inuusuttaani siulittaasup tullia, Mads Petersen, oqarpoq.