SIS immikkoortortaqarfiit ilaasa isumaqatigaat

Siumup immikkoortortaqarfiisa arlallit, Siumut Inusuttunut Suleqatigiiffiata, SIS-p Jens Napaattuup Siumup siulersuisuunerini siulittaasup tulliatut inissisimanerminik nalilersueqqittariaqarneranik oqariartuuteqarnerat isumaqatigaat.

Upernavimmi Siumup immikkoortortaani siulittaasoq, Hendrik Mørch siulersuisoqatini sinnerlugit oqaaseqarusunngilaq. Oqaatigaali nammineq isumaqatigigini, Siumut Inuusuttunut Suleqatigiiffiata Jens Napaattuup Siumup siulersuunerini siulittaasup tulliatut inissisimanerminik nalilersueqqittariaqarneranik oqariartuuteqarneq.

Palle Jerimiassen, Ilulissani Siumup immikkoortortaani siulittaasoq oqarpoq, Siumut Ilulissat isumaqartoq, Jens Napaattuup siulittaasup tulliatut inissisimanini nalilersortariaqaraa, soorlu naalakkersuisutut sulinini taamaaliorsimagaa, imaanngitsorli namminneq tunuaqqullugu oqassallutik Palle Jerimiassen oqarpoq.

Qaqortumi Siumup immikkoortortaani siulittaasoq, Lars Lundblad, siulersuisoqatini sinnerlugit oqarusunngikkaluarluni nammineq isummersorpoq. Lars Lundblad isumaqarpoq Siumup siulersuisuunerisa pisoq eqqartortariaqaraat paaseqatigiiffigalugulu.

- Siumup tatiginassusaa innarlerneqassanngippat siulersuunerni sulinini aamma nalilersortariaqarpaa, Lars Lundblad Jens Napaattooq pillugu oqarpoq.