Dronning Margrethe aamma Siriusip alapernaarsuisui Station DaneborgimiAssi: Michael Bager

Siriusip alapernaarsuisuisa mingutsitsinerat misissuiffigineqalersoq

Danmarkimi ingeniøritut suliffeqarfimmit GEO-meersut Tunup avannaarsuani Daneborgimut misissuiartortussanngorput. Siriusip alapernaarsuisuisa qitiusoqarfiata ukiuni 60-ini tassaniinnerani avatangiisit innarlerneqarsimanersut misissuiffigissavaat. Suliffeqarfik nittartakkamini taama allaaserisaqarpoq

GEO danskit illersornissaqarfianit suliassamik iminneqarluni Nunatsinnut aallartitaqartussanngorpoq. Daneborgimi 1951-imiilli Siriusip alapernaarsuisuinit qitiusoqarfigineqartumi qanoq mingutsitsisoqarsimatiginersoq misissuiffigineqassaaq.

Ilaatigut orsersornermut atatillugu mingutsitsisoqartarsimavoq. Daneborgimilu misissuineq mingutsitsinerup sinerissamut siaruaattoorutigineqannginnissaanik siunertaqarpoq.

GEO-p avatangiisinut tunngatillugu teknikkikkut qillerinerit 90-it missaat aggustip qaammataani ingerlatissavai, qillerinerillu taakku meterinik marlunnik ititigissapput minnerpaamilluunniit nuna qiuaannartoq qaarsorluunniit angullugu. Daneborgimi mingutsitsinermik nalunaarsuineq danskit suliffeqarfiat COWI sumiiffimmi avatangiisinik nakkutilliisuusoq suleqatigalugu ingerlanneqassaaq.

Aamma atuaruk ASSIT Amerikamiut aallartitaata Siriusip alapernaarsuisui tikeraarai

Tunulli avannaarsuani qilleriniarneq ajornaatsuinnaanngitsuuvoq. Nunap iluata manngertuunera pissutigalugu qilleriffigiuminaappoq, silallu pissusiata pikkunartuunera pissutigalugu umiarsuarmik ukiumut ataasiinnarmik pajuttuisoqartarluni.

Danmarkimilu ingeniøritut suliffeqarfimmeersut umiarsuaq aappaagu aqqusaarpat aatsaat angerlarnavianngillat. Suliassartik naammassigunikku timmisartorlutik angerlassapput, qillerinermulli atortorissaarutit 2017-imi juulip qaammataani umiarsuaqaqqinnissaata tungaanut ukiisinneqassallutik.

Qimussimik alapernaarsuisartut Siriusimeersut Nuna Allanngutsaaliugaq Tunup avannaarsuaniittoq nakkutigalugu angallavigisarpaat. Siriusip alapernaarsuisui sumiiffimmi nakkutilliisarput politiitullu oqartussaassuseqarlutik nunarujussuarmi eqqissisimatitsinermut aalajangersakkat atuutsinneqarneri nakkutigalugillu ilisimasassarsiorlutik angalasut nakkutigisarpaat.  



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat