Siriusikkut Canadamiut sakkutuuinik sungiusaqateqarput

Qimussimik alapernaarsuisartut Siriusikkut, Canadamiut sakkutuuinik Qalasersuup sikuani, Canadap avannaani siullermeerlutik sungiusaqateqaqqammerput.
Allattoq Elisa Isaksen
apriilip 26-at 2010 07:59

Taamatut sungiusaqatigiinnermi suleriaatsinik paarlaatseqatigiinnissaq siunertarineqarpoq, Taamatullu tammaarsimaaqatigiinneq illuatungeriinnut pissarsiffiulluartoq, Kangilinnguani sakkutooqarfimmit oqaatigineqarpoq.

- Canadamiut sakkutuui pikkoreqaat, nunamik pinngortitallu allanngoriataartarneranik ilisimaarinnillutik, aamma suut sillimaffigineqarnissaannik ilisimasaqarluarlutik, Kangilinnguani sakkutooqarfik nittartakkamini taama allappoq.

Nunatsinni Canadamilu alapernaarsuinermi assigiinngissutaasoq annerpaaq tassaavoq, Siriusikkut qimussimik alapernaarsuisarmata, Canadamiullli qamuteralaat atortarlugit.

Sikumi tammaarsimaaqatigiinneq Amerikamiut aallartitaanit Canadamilu illersornissamut ministerimit tikeraarneqarpoq, taakkulu kalaallit qimmiinik soqutiginneqisut oqaatigineqarpoq.

- Qimmit soqutigineqarluarput. Taamaalilluni Siriusikkut Tunup Avannaarsuani alapernaarsuisarnerat oqaluuserineqarluarluni, Kangilinnguani sakkutooqarfimmit ilaatigut taama oqaatigineqarpoq.

Siriusikkut Canadami sungiusaqataanerat ullumikkut naammassineqassaaq, alapernaarsuisartullu Nunatsinnut angerlassallutik.