Siriusikkut Akilinermi sungiusaqataalerput

Angutit marluk, qimmit 13-it qamutillu ataatsit, qimussimik alapernaarsuisunit Siriusimeersut, qaammammi matumani kingusinnerusukkut Canadami Nunavuup Avannaanukassapput, tassa Siriusikkut Canadamiut sakkutuuisa Issittumi sungiusarneranni siullerpaamik peqataassagamik.
Allattoq Elisa Isaksen
apriilip 02-at 2010 16:23

Sungiusarnerup "Operation Nunalivut"-mik taaguuserneqarsimasup, sakkutuut silap pissusaata allanngoriartorneranut qanoq naleqqussarsinnaanerat, ilaatigut siunertarineqarpoq.

- Sikup aakkiartornerata kingunerisaanik immallu sikuusarunnaarnerata kingunerisaanik, unammilligassanut tunngasunik nunat issittumiittut suleqatigiittariaqarnerat, matumuuna ersersikkusupparput, Canadami sakkutuut qullersaasa ilaat David Millar, nutaarsiassaqartitsivimmut Ritzauimut oqarpoq.

Canadamiut aviisianni The Globe and Mail-imi allaaserineqarpoq, Siriusimeersut Canadamiut sakkutuui 180-inik inuttallit Nunavuup avannaani Umimmaat Nunaanni naapissagaat, qimussimillu alapernaarsuisartut immap sikuatigut Nunatsinnut ikaartussaassapput. Sungiusarneq Tartupaluup qanittuani pissasoq oqaatigineqarpoq.

Sakkutuut taamatut sungiusarneranni timmisartut qamuteralaallu atorneqartaraluarput, taamaattorli silap pissusaata allanngoriartornerata kinguneranik umiatsiaat pullattakkat qulimiguullillu siullerpaamik atorneqassapput.

- Maanna siku minnerulerpoq imarlu annerulerluni, taamaattumik sungiusartarnivut naleqqussartariaqaleratsigik. Taamaalilluta umiatsiaat pullattakkat ullutsinni sungiusarnitsinni nassartalerpavut, naak ukiut qulit matuma siornagut tamakkua eqqarsaatiginerluunniit ajoraluarlutigik, David Millar oqarpoq.

Sungiusarneq apriilip 15-anniit 27-annut ingerlanneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq