Sipaarutissat ujartorneqalerput

Qeqqata Kommunia aningaasarsiornikkut ajornartorsiornermik aamma eqqugaagaluartoq, akileraarutip 25 procentiuinnarnissaa aalajangiusimaneqarpoq.

Karsimiittuuteqarluarnerli taamaallaat 2011-p ingerlanerani iluaqutaassaammat, sipaarutissat ujartorneqalerput.

Aningaasameernerup kingunera Qeqqata Kommuniata malugilerpaa, tassa suliffiit ilaat matuneqartariaqalermata matusariaqalerlutilluunniit. Soorlu Atammiup eqqaani olivinimik piiaavik 2009-p naanerani matusariaqarsimavoq. Sisimiuni erngumik nukissiorfik 2010-p aallartisimalernerani naammassineqarpoq, Kangerlussuarmi efterskole 2010-p naanerani matussaaq, pineqaatissitanullu inissiisarfik ukioq-manna ukiup naanerani aamma matussalluni.

Kiisalu Royal Greenlandip Sisimiuni suliffissuaataata nutarterneranut atatillugu sulisuminik 2011-p aallartinnerani ikilisaasariaqassasoq, borgmester Hermann Berthelsen oqarpoq.

Suliffeqarfiit ikinnerulerneri soorunalimi akileraarutitigut isertitakinnerulernermik malitseqarput.

- Missingersuutitigut 41 millionit koruuninik amigartooruteqartoqassaaq, karsimiittuuteqarluarnerpulli tamatumani iluaqutaavoq, Qeqqata Kommuniani borgmesteri ilisimatitsivoq.

Kommunalbestyrelsep naatsorsuutigaa sipaarutissat tamakku innuttaasunik sapinngisamik eqquissanngitsut.