Sipaaruteqartoqarnissamut atorfillit ernumapput
Namminersorlutik Oqartussat pisortaqarfiini ataasiakkaani ukiup tulliani 1 procentinik sipaaruteqartoqarpat soraarsitsisoqannginnissaq, Aningaasaqarnermut Naalakkersuisup Andreas Uldumip qulakkeersinnaanagu oqaatigaa.
Aamma atuaruk Anda: Soraarsitsisoqannginnissaq qulakkeersinnaanngilara
Atorfillit Kattuffianni ilaasortat Namminersorlutik Oqartussani atorfeqartut 15 millionit koruuninik aappaagumiit sipaaruteqartoqarnissamut ernumapput. Aningaasanut inatsisissap aappaagumut atuuttussap iluatsinnissaanut Naalakkersuisut pisortaqarfinni aqutsisoqarfinnilu sipaarutigineqartussanik nassaarniartussaapput.
Namminersorlutik Oqartussani sipaaruteqartoqassaaq pisariillissaasoqarlunilu
Naalakkersuisoqarfinni arfineq marlunni aappaagumut sipaarutissat 1 proocentiusut, kooruuninngorlugit 2 millionit koruunit nassaariniarneqartussaapupt. Amerlanerusullu ukiuni tulliuttuni.
Sipaarniartoqarnera Atorfillit Katuffianni ernumassutigineqarpoq.
- Sipaarniarneq sulisunik soraarsitsiortortoqarnissamik kinguneqassanngitsoq oqaatigineqaraluartoq, kisianni sulisut kattuffiattut sulisut kalluartoqartussaammata ernumassutigisinnaavarput soraarsitsiortortoqarnissaa, AK-mi siulittaasoq, Dina Olsen KNR-imut ippassaq oqarpoq.
Aamma atuaruk Naalakkersuisut sumi sipaarniarnerlutik aaliangerpaat
Peqqissutsimut Naalakkersuisoqarfik sipaaruteqartoqarnissami ilanngunneqanngilaq. Ilinniartitaanermut naalakkersuisoqarfik aappagu procentit affaannik sipaarfigineqassalluni.
Aningaasaqarnermut Naalakkersuisoq, Andreas Uldum, neriorsuuteqarpoq sipaaruteqartoqarneratigut innutaasunik kiffartuussineq innarlerneqassanngitsoq.
- Naalakkersuisoqarfiit tamakkerlutik ukiumut 1,6 milliarder koruniusunit taakkunannga 16 millionit koruuninik sipaarniartoqarnera innutaasut sullinneqarnerannut innarliinissaa naatsorsuutiginngilara, Andreas Uldum oqarpoq.
Taamaakkaluartoq kiffartuussinerup ajorseriarneranik kinguneqarnissaa Atorfillit Kattuffiannit ilimagineqarpoq.
- Sipaarniartoqarnermi atorfinnik nutaanik atornititsisoqanngippat, sulisut sinneruttut ulapinnerulertussaapput tamatuma kinguneranik sullissinerup ajorsiarnissaa ilimagisinnaavarput, AK-mi siulittaasoq, Dina Olsen oqarpoq.
Atorfillit Kattuffianni ilaasortat Namminersorlutik Oqartussani atorfeqartut, atorfeqarnermut isumaqatigiissutit naapertorlugit ingerlanneqarnersut, AK-mit malittareqqissaarniarneqarput.
Aamma atuaruk Aningaasanut inatsit 2015-imoortoq akuerineqarpoq
Kalaallit Nunaani ilinniagartuut Kattuffianni, ASG-mi, ilinniagartuut assigiinngitsut qulingiluat ilaasortaaffigissaani aamma ernumasoqarpoq, siulittaasoq Louise Tøt ima oqarpoq:
- Anda Uldum sipaaruteqartoqarnissamik nalunaaruteqareerluarluni, atorfiit sorliit sipaarfigineqassanersut nalunaarutiginngilai, taamakkaluartoq naatsorsuutigaarput sulisut ikilisinneqarnissaanut nalunaaruteqarnissaq Namminersorlutik Oqartussat sulisitsisutut malittarisassat malillugit iliorumaaartoq, Louise Tøt oqarpoq.
Sipaarniartoqarnermi atorfiit inuttaqanngitsut inuttalerneqannginnissaat periarfissatut isigineqarsinnaasut Kalaallit Nunaani ilinniagartuut Kattuffianni, ASG-mi, siulittaasoq, Louise Tøt, oqarpoq.
