Sipaarniarneq mutinngortoq
USA-mi nukissiuutinik atuinikkut sipaarniarneq mutinngorpoq. Amerikamiut amerligaluttuinnartut qatsulluinnarpaat, USA-mi politikkerit sila pillugu politikkeqarnikkut iliuuseqanngippallaarnerat.
Illoqarfiit 700-t maanna suliniaqatigiiffimmut “Cool Cities”-imik taaguutilimmut ilanngutereerput.
Illoqarfiillu ilaasortaasut imminnut pisussaaffilersimapput, Kyoto-mi isumaqatigiissutip USA-mut piumasaqaatigisassaralui assigiinngitsunik suliniuteqarlutik anguniassallugit. Imaluunnit piumasaqaatigineqarsimasut sinnerlugit pitsaanerusumik anguniagaqassallutik.
Amerikap kitaani illoqarfissuarmi Seattles-imi borgmesterip suleqatinilu arfineq marluk 2005-imi suliniarneq aallartippaat. Suliniarnerlu maanna allanit soqutigineqarluni ilannguffigineqartalerpoq.
Suliniarnermi aqutsisoq, Glend Brand, DR-ip aallakaatitassiaanut paasissutissiisartumut, Orientering-imut oqarpoq, suliniarneq takoqqusaanginnarnermik isumaqanngitsoq,
- Præsident Bush-ip pisortatigoortumik politikkianut sanilliullugu angusaqarluarusulluni sila pillugu politikkeqarneq, aningaasannanniutaalluarsinnaavoq, taanna oqarpoq