Sipaarniarfiusussat arlaqarput
Aappaagumut aningaasanut inatsisissamut naalakkersuisut siunnersuutaat ippassaq saqqummiunneqarpoq.
Aningaasanut inatsisissamut siunnersuummi naalakkersuinikkut suliassaqarfiit arlaqartut sipaarniarnermik eqqugaassapput, aammali suliassaqarfiit arlaqartut siornamut naleqqiullutik amerlanerusunik aningaasaliiffiginiarneqarlutik.
Sipaarniarnermik eqqugaanerpaassapput angallanneq, taapiissutit assigiinngitsut soorlu aalisarnermi tapiissuteqartitsisarneq kiisalu nunalerinermi tapiissuteqartitsisarneq. Aalisarnermi ESU aqqutigalugu tapiisarneq ullumikkut atuuttoq atorunnaarsikkiartuaarneqassaaq aalisarnermi aningaasaateqarfimmik taarserneqassalluni.
Nunalerinermi ilaatigut qularnaveeqqusiinerit peerneqarnissaat Nunalerinermut Pisortaqarfimmit massakkumiit piareersarneqartoq, Aningaasanut Naalakkersuisoq Josef Motzfeldt erseqqissaavoq.
Sipaarniarneq ilutigalugu aamma ingerlatsinikkut naleqqussaasoqassasoq aningaasanut naalakkersuisoq oqarpoq.
Aningaasaliissutissatut siunnersuummi ilinniartitaaneq, inuussutissarsiutitigullu nutaanik aallarniiniartut salliutinneqarput.
Josef Motzfeldt -naapertorlugu pingaarnerpaajutillugu ilinniagaatsussuseq akiorniarneqassaaq. Aningaasanut inatsisissatut siunnersuut Naalakkersuisut partiillu ullumikkumiit isumaqatigiinniutigissavaat.
