Sipaarneq ilikkartariaqarpaat
Innuttaasut aalisartut ilanngullugit suliffissaarukkunik periarfissaqarput inunnik isumaginnittoqarfimmut saaffiginnissallutik taamalu pisortanit ikiorserneqarlutik.
Taama nassuiaavoq isumaginninnermut naalakkersuisoq Maliina Abelsen Siumup siulittaasuata Aleqa Hammondip paragraf 36 naapertorlugu apeqquteqaateqarneranut. Taassuma paasiniarpaa naalakkersuisut sunik pilersaaruteqarnersut aalisartut piniartullu piffissami matumani isertitakilliortut qanoq ikiorserniarneqarnersut. Qaleralittassat Uummannap Upernaviullu eqqaanni tamakkerneqareerput immikkullu pisasseeqqittoqarnavianngilaq.
Maliina Abelsenip erseqqissarpaa aalisartut atugaat 2009-mut sanilliullugit allanngorsimanngitsut pisassiissutit taama amerlatigiinnarmata. Pissutsilli ullumikkorpiaq atuuttut pilersimapput pisassat siornamut sanilliullugu pilertornerusumik tamakkerneqarsimammata. Tamatuma ilimanarsisippaa aalisariutit ilaasa aalisarsinnaasussaat pitsanngoriarsimavoq taakkuli aalisarluarnerannit umiatsiaararsortut eqqorneqarput. Taamaammat aalisartut ilaat siornarnit isertitaqarnerusimapput allat isertitakilleriarsimasut.
Aalisartorli piniartorlu isertitaarukkuni innuttaasut allat assigalugit ikiorserneqarsinnaavoq kommunemut saaffinninnermigut tamannalu pissaaq inuussutissarsiutigalugu piniartuunermut allagartaq annaanngikkaluarlugu. Piumasaqaataasoq tassatuaaginnarpoq suliffissaaleqisuussasoq.
Maliina Abelsen erseqqissaavoq isumaginninnermut naalakkersuisoqarfik kommunet isumaginninnermut immikkoortoqarfiinut ikiorsiissutit atornissaat pillugut ilitsersuutinik nassiussuisimasoq tassanilu aamma erseqqissarneqarsimapput aalisartut piniartullu pisinnaatitaaffii.
Suliffissaqartitsiniarneq siuarsarniarlugu suliniutit Qaasuitsup kommuneani ingerlanneqarsimapput uuliasiornermi sulilersinnaasunik pikkorissaasoqarsimalluni aammalu suliffissuarni sulisut pikkorissarneqarsimallutik.
Maliina Abelsenip aamma oqaatigaa aalisartut sulisartullu aappaagu taamaasinerani suliassaarunnissaat pinngitsoorniarlugu naalakkersuisut suliniuteqartut.
Tamanna anguniarlugu qaammatikkaartumik pisassiissutit atulerniarneqarput taamaaasilluni anguniarneqarluni aalisarneq ukioq tamaat ingerlasussanngorsinnaassasoq tamannalu 2011-miit atortuulersinniarneqarpoq.
