SIP Narsaq: Jess utoqqatsertariaqarpoq!
- Ilaasortat tamarmik siulittaasoq uparuarsinnaasussaavaat, siulittaasorlu ilaasortanut nipangersaalluni sioorasaarisussaanngilaq.
SIK-p siulittaasua Jess G. Berthelsen pillugu taama oqarput Narsami SIP-mi ilaasortat. Taakku taama qisuariarnerminnut tunngavigaat Qanoruumi ippassaq Aasianni SIP-mi siulittaasoq oqaaseqarmat avammut oqaaseqarsimanini pillugu Jess G. Berthelsenimit sioorasaarneqarsimalluni. Jess G. Berthelsenili sioorasaarisimannginnerarpoq.
Narsami SIP-p siulittaasua Kristian Petrussen ima oqarpoq:
- Aasianni SIP-p siulittaasuannut Jess G. Berthelsenip periaasia qunusaarinnissimanera tunuartinniarsaraarput, utoqqatsinngippat aammalu SIK avaqqullugu aviisiliortunut kalerriisimanera pillugu. Uagut annilaangassutigaarput kinaluunniit ilaasortaq siulittaasumut siulittaasuunermullu uparuaasinnaanera unitsinneqassanngimmat, Kristian Petrussen oqarpoq.
Taanna nassuiaavoq ullaaq manna ataatsimiinnermi aalajangersimallutik piumasariniarlugu Jess G. Berthelsen Aasianni SIP-p siulittaasuanut utoqqatsertariaqartoq. Qalleqqissaavoq taanna utoqqatsinngippat immikkut ataatsimeersuartoqarnissaa anguniarlugu sinerissami katersuiniarlutik.
- Jess G. Berthelsen utoqqatsinngikkuni tunuartariaqarpoq, Kristian Petrussen oqarpoq.
Jess G. Berthelsenilu aperaarput utoqqatserusunnersoq.
- Naamik! Peqqutissaqanngivippunga utoqqatsissallunga aamma Nikolaj Rafaelsenip taamatut saqqummiussinera eqqunngimmat, Jess G. Berthelsen oqarpoq.
Taassuma ajuusaarutiginerarpaa inuttarsiuisutut pissuseqartoqalernera.
- Ajuusaarnarpoq pasillermanga sioorasaarisimasunga, isumaqaruni sioorasaarisimasunga taava pinerluttaalinermut inatsisit ataanni taanna suliassaavoq. Isumaqaruni sioorasaarisimasunga taava politiinut tunniunniarlinga, pasilliineq taanna annertoorujorujussuuvoq taamaattumillu allanit suliassaalluni, oqarpoq.
Taanna aperaarput Nikolaj Rafaelsen oqarsimasoq SIK sanngiilliartornerarlugu tamatuminngalu oqaloqatigisimaneraa.
- Soorunami sianerfigaara, oqarfigaara pissusissamisoorsimassagaluartoq tusagassiutinut nalunaaruteqannginnermini SIK-mut sianilaarluni paasiniaasimassagaluartoq. Eqqumiiginalaarpoq aamma siornali taanna pisimavoq taava sooq siornali Nikkulaat SIK-mut sianerluni paasiniaasimanngila, ukioq ataasersuaq utaqqinani, Jess G. Berthelsen oqarpoq.
Aperaarput utoqqatsinngippat Narsami SIP-imi ilaasortat Jess G. Berthelsen tunuartinnialersaaleraat, tamannalu annilaanngatigineraa.
- Qujanartumik SIK-mi inatsisit ima aaqqissuussaapput immikkoortortaqarfiit amerlanerussuteqarlutik aatsaat kissaatigippassuk aatsaat ataatsimeersuartoqarsinnaasoq, immikkoortortaqarfiit tassani apeqqutaaginnassapput, taama oqarpoq SIK-p siulittaasua Jess G. Berthelsen.
