Sioux-indianerit uuliap aqqutissaanut akerliusut
Uuliasiortitseqatigiit ilaata North Dakotami indianerit najugaqarfigisaannik aqqusaarlugu uuliamut ruujorissaata sananeqarnera unitsinniarlugu indianerit akerliussutsiminnillu takutitsisut ataatsimoorlutik saassussipput. TV2.dk taama allaaserisaqarpoq.
Indianerit tamaanilu oqartussat akornanni aaqqiagiinngissutit piffissami kingullermi sakkortusiartuinnavissimapput. Indianerit reservatiminniittut ikinnerpaamik 20-t aggustimi tigusarineqarput.
Indianerit akerliussutsimik takutitsisut ilaat tassaavoq Hawste Wakiyan Wicasa. Akerliussutsimik takutitsinerup oqaluttuarisaanermut pingaaruteqassussaa Tuluit tv-qarfissuannut BBC-mut nassuiaateqarfigaa:
- Sioux-indianerit akornanni immikkoortut arfineq-marluk Little Bighornimi akersuuttoqarmalli aatsaat ataatsimoorlutik tamaviaaruteqarput, indianerit USA-llu sakkutuuisa akornanni taamani 1876-imi akersuuttoqarnera matumani eqqaallugu.
Akerliussutsiminnik takutitsinerit pissutaallutik ullut tamangajaasa tigusarinnittoqartarpoq.
Uuliamut ruujorimik reservati aqqusaarlugu sanasoqarnera kulturikkut eriagisassamittut isigisami saassunneqarneratut indianerit isigaat. Ukiut qulikkaat kingulliit ingerlaneranni aatsaat taama annertutigisumik akerliussutsimik takutitsisoqarpoq.