Siornatut kapisilinniartoqassaaq

Atlantikup Avannaani Kapisillit Piujuartinneqarnissaat pillugu suleqatigiiffiup NASCO-p ulluni 4.- 6. juunimut 2011 Ilulissani ukiumoortumik ataatsimiinnerani angusat maanna Naalakkersuisunit akuerineqarput, Aalisarnermut Piniarnermullu Naalakkersuisoq Ane Hansen nalunaarpoq.
Allattoq Jaaku Lyberth
juunip 23-at 2011 16:03

Ataatsimiinnermi angusat akuerineqarnerannut ilanngullugu nalunaarutigineqarpoq kapisilinniarneq ukiumut kingullermut naleqqiullugu allanngortinneqanngitsoq, tassalu 2011-imi kapisilinniarneq 2010-mi piumasaqaatit naapertorlugit pisinnaassaaq.

Nammineq atugassanik kapisilinniarneq ingerlaqqissinnaasoq Aalisarnermut  Piniarnermullu Naalakkersuisoqarfimmit nalunaarutigaat.

Suliffeqarfinnut, neriniartarfinnut kalaalimineerniarfinnilu tunisisinnaaneq atuutiinnassasoq ilanngullugu nalunaarutigineqarpoq.

Kalaallit Nunaata imartaani kapisillit amerlassusiannik nutaanik missisuisoqarnissamik Kalaallit Nunaannit piumasaqaatigineqarpoq.

Aalisartut nalunaarutigisartagaat  malillugit kapisillit amerlassusiat ajunngilaq.

Kapsillit angisuut sumiiffinni arlalinni naammattoorneqartarput.

Kapisillit aningaasarsiutigalugu aalisarneqarneqartalernissaannik ammaasseqinnissaq aalisartut piniartullu kattuffiannit KNAPK-imit piumasarineqarpoq, soorluttaaq nunat atlantikup avannaaniittut  NASCO-mi ilaasortat arlallit tamanna atuutsilersereeraat. Sulili aalajangiisoqanngilaq.