Siornatigut sulisuusimasoq: Annersaasoqartarpoq
- Paarsama ilaata qimaanerata kingornatigut, taavalu naassaarineqarnerata kingornatigut takanani peqqarniitsorujussuarmik pineqartoq isigivara. Qimaasinnaanera pillugu oqalorujuunneqarluni niaquatigullu patittarneqarluni. Isigisara sakkortoorujussuuvoq, Tûgdlimmi 2008-mi sulisuusimasoq oqaluttuarpoq.
Taassuma annersaasoqarnera marloriarluni isiginnaarsimavaa. Aammali oqaatsinik sakkortuunik atuineq nalinginnaaqisoq oqaluttuaraa.
Taama pisoqareernera qanoq misiginarpa?
- Nukappiaraq ersiorpasittorujussuuvoq, taqissimaarluni. Assorsuaq ersiorpasipput nuanniilliorpasillutillu.
Pisunik taamaattunik isigisaqaraangavit sooq akuliuttanngilatit?
- Sakkortungaatsiartumik pineqarneri aamma uannut sulilerluni tupannartorujussuuvoq, taama peqqarniitsigisumik pineqarmata. Sualuttorujusuuvoq. Sulilerlaajoriarama tassani qanoq iliornissannut nalornivunga. Taama pisoqarnera uannut tupannartupilussuugami, taama pisoqarnissaa ilimaginngikkaluarakku. Taava qanoq iliornissannut nalornissuteqarama arlaatigut qisuariaateqanngilanga, sulisuusimasoq oqarpoq.
Taanna nassuiaavoq, nammineq ilinniagaqarani aammalu atuarsinnaanani allassinnaannanilu. Naallu perorsaanermik ilinniagaqanngikkaluarluni, eqqissisimasumik pissuseqarami meeqqat iluaqutigisaannik oqaloqatigisinnaasarsimavai.
Aammalumi sakkortuumik pisoqartaraluartoq, aamma ullunik nuannersoqarpoq. Ingammik maluginiarpaa, umiarsuaaraq atuarfiutigisoq illulu Qooqquniittoq assigiinngeqisut:
- Qooqquniilluni nuannersorujussuusarpoq. Meeqqat oqaloqatigalugit tusaaneqarlutik misigileraangata, sulineq taamaalilluni nunnersunngortarami. Taava taamaalillutik nammineerlutik ammariartuaarusaartaramik, Tûgdlimmi 2008-mi sulisuusimasoq oqarpoq. Taassuma atini saqqummiukkumanngilaa, kinaanerali Radioaviisimiit ilisimaarivarput.
Naatsumik oqaluttuartoq uani tusarnaaruk:
