Siornali toqutsisoq suli nassaarineqanngilaq

Siorna februaarimi Nuummi angut inimini toqutaasimasoq nassaarineqarpoq ullorlu manna tikillugu toqutsisua nassaarineqanngilaq.
januaarip 10-at 2008 10:34

- Eqqarsaatigalugu neriunnaraluarpoq toqutsisoq nammineq nassuissasoq, ingasappormi toqutsisoq taamak sivisutigisumik imminut isertuussinnaammat,

taama qialluni oqarpoq siorna arfininngornerup ullaassaani februaarip 24-iani Nuummi toqutaasup Jens Peter Berthelsenip pania Severine Serubabelsen.

Ulloq manna tikillugu Jens Peter Berthelsenip toqutsisua nassaarineqanngilaq.

- Taamanikkulli paasisaqaqqinnikuunngilagut. Toqutaammat politiit marluk aggernikuupput uagut nammineerluta politiinut saaffiginnittarnikuuvugut namminneerlutilli saaffiginninneq ajorput, Severine Serubabelsen oqarpoq.

Taanna erseqqissaavoq manna tikillugu politiiniit paasitinneqassanani naalliunnaqisoq.

Nuummi politiit tamanna pillugu attaviginiaraluarpagut ataatsimiittoqarnerali pissutigalugu akissuteqartissinnaasimanngilagut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq