Siorna hash 48 kiilu arsaarinnissutigineqarpoq
Hashi 48 kiilu, ikiaroornartumillu tuniniaanermit isertitat 3,4 miliuunit koruunit politiit siorna arsaarinnissutigaat.
Politiit nalunaarusiaminni ilanngullugu allapput, haship taama annertutigisup arsaarinnissutigineranut, nunatsinni haship akisunerujussua pissutigalugu eqqussiniarnerup pilerigineqarnera peqqutaasoq.
Ikiaroornartut pillugit inatsit 2007-imi 550-eriarluni unioqqutinneqarpoq, tassa 2006-imut sanilliullugu 13 procentimik unioqqutitsisoqarnerulluni. Haship 48 kiilup saniatigut iisartakkat amfetaminit 35 gramit kokainilu 1 gramingajak siorna arsaarinnissutigineqarput.
Nalunaarusiap taamaalilluni aamma takutippaa ikiaroornartut sakkortuut Kalaallit Nunaannut suli eqquteriarneqarneq ajortut.
Inatsisinik unioqqutitsinerit amerleriaraluartut amerleriarnerusimannginnerat, ikiaroornartunillu sakkortunerusunik tuniniaasoqarneq ajornera naammagisimaaritsik politiit nalunaarusiaminni allapput.
2007-imi hashimik eqqusseriaraluarnerit annertunerpaat ilaat pivoq hashi 21 kiilu sanaartugassat akornannut toqqorlugu umiarsuakkut Nuummut eqquteriarneqaraluarmat.
