Siorna finalertut annguteqqipput
![](/sites/default/files/styles/image_934x467/public/article_images/header_bold_630.jpg?itok=U_I5_NiO)
Arsaalluni angutit pissartanngorniunnerisa naggataarneqarnerat sapaatiuppat Ilulissani aallartissaaq anngunniunnerillu kingulliit ippassaq sapaammi naammassipput. Unamminerit ilaatigut naligiiffiussagunarput anngunniunnernimi taama pisoqareermat.
Qeqertarsuup tunuaniit annguttut pingasut sakkortuujupput. Siorna pissartat G-44 Qeqertarsuarmiit aamma Kugsak 45 Qasigiannguaniit mellemrundemi 1-1-mik naligiiginnarput. Qeqertarsuup tunuaneersut pingajoraat aaqqissuisut Nagdlúnguak Ilulissaniit siorna anngutinngitsut. Ukiormannali aaqqissuisussaagamik piareersarluarpaloqaat.
Siorna finalertut arlaat B-67 Nuummeersut taamani finalemi straffeqattaareerlutik ajorsartut annguteqqipput qeqqaniillu SAK Sisimiuneersoq annguteqatigaat.
Kujataaniit Eqaluk Tasiusameersoq aamma Nagtoralik Paamiuniit anngupput, tunumiit ATA Tasiilamiit annguttut.
Avannaaniit FC Malamuk Uummannameersoq aamma UB-83 Upernavimmeersoq anngupput.
Puljenut suli makitsisoqanngilaq.