Siorapalummit Aarhusimut
Danmarkimi palasitut atorfik qangali inuttalerneqarnikuunngitsoq, Danmarkimi ilageeqarnermut ministerip 2011-mi novembarimili nalunaarutigaa, kalaallit namminneq piumassutsiminnik Danmarkimut nuussimasut palaseqalernissaat.
Tamassumalu nalunaarutigineqarneranit ukiut aappaata affaa qaangiutillartorlu, palasitut atorfik maanna inuttalerneqarpoq. Tassalu nunaqafiit avannarlersaanni, Siorapalummi najugaqartoq, Juaanna Platou Aarhusip brovsteqarfiani augustip aallaqqaataaniit palasitut atorfeqalissaaq. Tassanilu palasinngornissani Juaanna Platou-p qilanaaraa.
Danmarkimi palasi ulloq manna tikillugu ataasiinnaavoq, taassumalu suliassarai, kalaallit namminneq piumassuserinngisaminnik Danmarkimut nuussimasut soorlu parnaarussivinnut inissinneqarsimasut aamma sullitassaralugit kalaallit napparsimmavinni uninngasut.
Juaanna Platou Qaanaap palaseqarfianit sulinngiffeqarpoq Siorapalummiulu inukitsunnguami ilaquttani ilagalugit najugaqarluni.
Augustip aallaqqaataanit sulileruni, kalaallit Danmarkimiittut siammasissumilu najugaqartut sullisilersussaassavai. Pissagagisaasali annersarivaat nunaqarfimmit inukitsunngiamik Danmarkimi illoqarfissuarmut nuunnissaq.
Kalaallit Danmarkimut namminneq piumassutsiminnik nuussimasut qangali palasissaaleqisarput, Danmarkimi kisiartaalluni maanna palasiusumut, Jens Kristian Kleistimut ulapaartitsisaqaluni. Qallunaat ilageeqarnermut ministeriata, 2011-mi novembarimi nalunaarutigaa tamanna aaqqinneqassasoq. Tamatumalu kingorna Juaanna Platou atorfimmut qinnuteqarpoq akuerineqarlunilu, tassalu ilaquttani ilagalugit nuussallutik.
- Meeraanerma inuusuttuaraanermalu ilarujussua Danmarkimi najugaqartareernikuugama, Siorapalummit Danmarkimut illoqarfissuarmut nuunissara imatut ippinnanavianngilaq. Ilaquttakkalu qilanaaraarput Aarhusimut nuunnissarput, Juaanna Platou oqarpoq.
