Siorapalummi illumik attartortoq sallunerarlugu INI A/S pisuutitsivoq
Juaanna Platou arlaleriarluni INI A/S-imut naammagittaalliortarluni oqaluttuarpoq tamannali kinguneqartinneqartarsimanngitsoq oqaatigalugu. INI A/S maanna oqarpoq Juaanna Platoup Radioaviisimut paasissutissiineri eqqunngitsuusut.
INI A/S-ip illuutinut isumaginninnermut pisortaata, Sven Pedersenip siullermik oqaatigaa Siorapalummi ilinniartitsisup illutaani najugaqarnermi qaammammut akiliutaasartoq 6000 koruunit missaanniinngitsoq.
- Illumut tassunga qaammammut akiliutaasartoq eqqortoq tassaavoq 1.872 koruunit.
INI A/S-ip illuutinut isumaginninnermut pisortaata, Sven Pedersen oqarpoq.
Juaanna Platoup qaammammut akiliutigisartagaasa allagartaat Radioaviisimit pissarsiatta takutippaa, qaammammut akiliutaasartup 4.127 koruuniusup saniatigut qularnaveeqqusiissummut 950 koruunik aammalu atuisilersitsinermut akiliut 1.100 koruunit ilanngukkaanni, qaammammut 6.177 koruuninik akiliisartut, innaallagissamut imermullu akiliut ilanngunnagu.
Illumut B 583-mut Juaanna Platoukkut siorna nuukkamik, illu usseeqisoq paasivaat aammalu imermut pumpe ruujorilu aseqqukoq paasillugu.
Taakku aaqqitassat aaqqinneqassammata Juaanna Platou INI-mut arlaleriarluni saaffiginnittarpoq oqarasuaatikkut allakkatigullu. Radiaoviisimit pissarsiaraagut Juaanna Platoup qarasaasiakkut nassiussaat arlaqartut.
INI A/S ullumi Radioaviisimut oqarpoq Juaanna Platou ataasiaannarluni oqarasuaatikkut saaffiginnissimasoq.
- Pisumut uunga attuumassuteqartumut illumik attartortumit naammagittaalliutinik tigusaqarnikuunngilanga, imermut pumpe ajortoq eqqaassanngikkaanni. Pumpillu aaqqinneqarnissaa sulissutigereerparput. Naammagittaalliutinik allanik nassiussaqarsimappat taakku ilisimanngilakka aamma ilisimannissinnaasut allat tusarniaraluarpakka tusarsimanersut, taamaattoqanngilarli.
Sven Pedersen oqarpoq.
Taassuma ilanngullugu opqaatigaa, INI A/S-imut saaffiginnissutit tamarluinnarmik allattorsimaffinni nalunaarsugaasartut.
- Oqaraasuaatikkut naammagittaalliutit tamarmik nalunaarsorneqartarput, tassanili apeqqutaavoq suut naammagittaalliutaanersut. Unali pisoq naammagittaalliutitut uanga isiginngilara. Tassami illu taanna pillugu naammagittaalliutinik tigusaqarsimanngisaannaratta. Oqaatigiinnarsinnaavara illuni aaqqitassanik naammagittaalliortoqartillugu, taava tamanna sulissutigisarparput aaqqillugu. Tassalu pisumi uani aamma taamaaliorsimalluta.
Sven Pedersen oqarpoq. Tassunga aamma apeqqutigaarput, Juaanna Platou ataasiaannarluni saaffiginnissimappat tamanna uppernarsarsinnaaneraat, Sven Pedersenilu ima akivoq:
- Aap taamaappoq!
INI A/S-ip illuutinut isumaginninnermut pisortaata, Sven Pedersen oqarpoq.
