Siorapaluk tuluttut tyskisullu oqaatsinik ilinniarfiusoq

Nunaqarfitta avannarpasinnersaani Siorapalummi tuluttut tyskisullu ilungersuutivillugu qaammatini kingullerni ilinniartoqarpoq.

Assersuutigalugu atuartunit 17-init arfineq-marluk sapaatit-akunneri arfiniliinnaat ingerlaneranni nalinginnaasumik tyskisut ukiup affaa ilinniagassat atuarsimavaat.

Takornariat tikinngilaattaanni tyskeq oqaatsiminik ilinniartitsiartortoq qaammatini marlunni Siorapalummiippoq.

Pilersaarutaavoq aggustimi septembarimilu takornariat tyskiusut Siorapalummut tikinnissaat.

Taamaasillutik meeqqat imminnut, ilaquttatik nunaqarfitsillu pillugit takornariat oqaluttuussinnaalerpaat, atuarfiup pisortaa Eva Hunsballe oqaluttuarpoq.

Nunalerutinik ilinniartitsisoq tuluttut oqaasilik Raymond Molony qanittumi Siorapalummiipportaaq. Qaanaamiit qimusserluni Siorapalummut tikippoq aallarterlaanut tuluttut, nunalerinermilu atuartitsissutit atuakkat nassarlugit.

Tuluk ukiuni kingullerni 15-ini issittumi inuit ilisimatusarfigisimavai, Norgep avannaani, Canadami nunatsinnilu angalasarsimalluni.