Sioraasaarneqarlutillu qunusaarneqartarput

Meeqqat atuarfiini ilinniartitsisut annersarneqarnissamik sioorasaarneqarlutilluunniit nalunaaruteqartartut amerliartuinnarput.

Ukaliusami ilinniartitsisoq Helene Jensen oqaluttuarpoq toqqaannartumik ilinniartitsisunik annersaasarnerit takussaanngikkaluartut, taamaattoq suleqatimi ilaat ataasiaannaratik qunusaarneqartartut nalunagu. Angajoqqaat meeqqaminnik sernissaallutik takkuteriasaarsinnaasarput qunusaaralutillu. Qunusaarneqartunut misigisaq nuanninngitsorujussuusartoq Helene Jensen nassuiaavoq. Meeqqat atuarfiini ilinniartitsisut annersarneqarnissamik sioorasaarneqartarnerat atuartullu ilinniartitsisunut pissusilersortarnermikkut ataqqinninnginnerat ukiuni kingullerni malunnarsiartuinnarsimanerarpaa.

Atuarfik Samuel Kleinschmidt-imi atuarfiup pisortaata tulliata Knud Jørgensenip ilinniartitsisut sioorasaarneqartarnerat uppernarsarsinnaavaa, ilinniartitsisulli illersorniarlugit oqaaseqarnissani kissaatiginngilaa.