Sioqqani uulia niuerutigineqarluarsinnaasoq

Pinngortitaq pillugu nunarsuaq tamakkerlugu suliniaqatigiiffimmit wwf-imit oqaatigineqarpoq, Canadamiut sioqqani uuliasiornissamut 2025-p tungaanut pilersaarutaat 2000 milliardit koruunit angullugit aningaasaliiffigineqartoq. Atuagassiap ingeniørenip nittartagaani taama allaaserinnittoqarpoq.

Uuliasiortitseqatigiiffiit BP, Shell aamma Statoil, Canadami nunap immikkoortuani Albertami suliniutiminnik aallartitseriinngikkunik pilersaarusioruttulerput. Kuussuup Athabascap eqqaani orpippassuaqarferujussuup ataani uuliaqarpoq, sioqqani uuliaqarfik kimmut Amerikap avannaani Alaskamit - kangimut New Foundland tikillugu isorartussuseqarpoq.

Aningaasarsiornikkut ajalusoornerup kinguneranik, uuliap akia appariarujussuaraluarpoq, nappartamut 35 dollarseqalerluni, tamatumalu kinguneranik pilersaarutit arlallit taamaatikkallarneqarlutik. Maannali tamanna allanngorpoq, uulia nappartamut 80 dollarseqalermat. Tamatuma peqatigisaanik Mexicop Kangerliumanersuani ajutoornerup kinguneranik immami itisuumi qillerineq aningaasartuuteqarnarnerulerluni.

Immami itisuumi qillerinerit aningaasartuuteqarnarnerulerput, tamatumalu kinguneranik uuliasiortitseqatigiiffiit immami itisuumi issittumilu uuliasiornissaq kisiat aalluttariaqanngitsoq paasilerpaat.

Canadami sioqqani uuliasiornissaq, aamma qallunaat suliffeqarfiinut iluanaarutaasinnaasoq, aviisimi Ingeniørenimi allaaserineqarpoq.

Tassami uuliap sioqqanit piiarnissaanut nukik, imeq akoorutissallu annertuut pisariaqartinneqarmata, taamaattumillu avatangiisinut teknologi, uuliasiortitseqatigiiffissuit piginngisaat atorfissaqartinneqartussaalluni. Tamakkununngalu qallunaat suliffeqarfii soorlu Cometas, Svendborg Brakes aamma Rockwool uuliasiortitseqatigiiffinnut pilersuisutut iluanaarujussuarsinnaapput.