- Oqaatigisinnaavarput, ataatsimiittialiap isumaliutissiissusiornermini oqaaseqaatai aallaavigalugit naalakkersuisoq qisuariarpoq, malersuinissaminik siorasaateqarluni, Inuit Ataqatigiit siulittaasuata tullia, Aqqaluaq B. Egede oqarpoq.Assi: Inatsisartut

Sioorasaarineq oqallisigineqangaatsiareersorlu: Ataatsimiititaliaq oqaaseqarumajunnaarpoq

Aqqaluaq B. Egedep Hans Enoksenillu oqarneri naapertorlugit Jens Immanuelsen-ip taakkua marlunngornermi atatsimiinnermi sioorasaarsimavai. Sumilli sioorasaarisimanersoq oqarusunngillat.

- Oqaatigisinnaavarput, ataatsimiitialiap isumaliutissiissusiornermini oqaaseqaatai aallaavigalugit naalakkersuisoq qisuariarpoq, malersuinissaminik sioorasaaruteqarluni, Inuit Ataqatigiit siulittaasuata tullia, Aqqaluaq B. Egede oqarpoq.

Inatsisartut pingasunngornermi ataatsimiinneranni Partii Naleraq aalisarnermut piniarnermullu naalakkersuisumut Jens Immanuelsenimut (S) tatiginnikkunnaarluni taasinissamik siunnersuuteqarpoq. Naalakkersuisup ataatsimiititaliamut sioorasaarisimanerarlugu suliassaminillu naammassinnissimannginnerarlugu ataatsimiititaliaq tunngavilersuuteqarpoq.

AAMMA ATUARUK Partii Naleraq Jens Immanuelsenimut tatiginnikkunnaartoq

Qanoq sioorasaarneqarnerminnik oqaluttuarusunngitsut

Partiip Naleqqap siulittaasuata, Hans Enoksenip, nassuiaanera naapertorlugu ataatsimiititaliap ataatsimiinnerani sioorasaarisimavoq:

- Unaluunniit piffissaq naagaluarpat malersorneqarsinnaanerput ataatsimiititaliap siulittaasuanut apuunneqarsimavoq. tassanilu soorunami toqqissisimanngissutigaarput taamatut naalakkersuisut akuliulluni inatsisartut inatsisiliassaat ajortumik inissitsimmagu.

Inuit Ataqatigiit siulittaasuata tullia, Aqqaluaq B. Egede oqarnera naapertorlugu Jens Immanuelsenip ataatsimiititaliamut suleqatiginninniarnera ilungersunarpoq. Oqaatigerusunnaguli qanorpiaq sioorasarneqarsimanersoq.

- Ataasiakkaarlugit taagussanngilakka, kisianni inatsisartut sulineranni, sulerisaatsit malillugiit ingerlatsinerput, aamma ataatsimiititaliap sulinerani taamatut pisoqariataarpoq. Imaannaanngitsorujussuuvoq, Aqqaluaq B. Egede oqarpoq.

AAMMA ATUARUK 10 for og otte imod: Jens Immanuelsen undgår mistilliderklæring  

Hans Enoksenip Aqqaluaq B. Egedellu oqarnerat naapertorlugu suliaq Inatsisartut Siulittaasooqarfianni ingerlanneqassaaq. Tassanngaanniillu suliaq nanginneqarpat, qanoq pisoqarumaarnersoq paasinarsiumaartoq taakku erseqqissaapput.

- Ukiorpassuarni naalakkersuinermi peqataallunga aatsaat taamattumik naammattuuigama ilungersunartorujussuuvoq, Hans Enoksen oqarpoq.

KNR-ip tassunga tunngatillugu ataatsimiititaliami siulittaasoq, Henrik Fleischer oqaaseqartinniaraluarpaa iluatsinnaguli.

Jens Immanuelsenip sioorasaarisimanani nammineerluni KNR-imut oqarpoq.

Inatsisissatut siunnersuut itigartinniaraa

Pisoq tamarmi inatsimmut nutaamut Naalakkersuisut paasiuminartunngortillugulu ullutsinnut tulluartunngortinniagaannut tunngavoq.

Inatsisissatulli siunnersuutip Inatsisartuni oqallisigineqalermat akerleriissutigineqarnera annertungaarmat ataatsimiititaliap inatsisissatut siunnersuut itigartinniarpaa. Taamaattoqanngilarli - Hans Enoksenili Jens Immanuelsenimut tatiginnikkunnaarnerarpoq.

Naalakkersuisut inatsisikkut uumasunut ajornartorsiutaasunut, soorlu nannunut, inunnut uumasuutinullu uilorianartorsiortitsisinnaasunut iliuseqarbiarnermut atugassanik malittarisassiorsinnaangortussaagaluarput, taavalu inatsisaattuliorluni piniarnissamut nakkutiginninnermik sukaterisinnaalissallutik, inatsisattuliorlutillu piniartunut iliuuseqarsinaassallutik.

Inatsit unioqqutitsilluni piniarnermut nakkutilliinermut unioqqutitsilluni piniartunut kinguneritinneqartitsisarnernut aamma sukaterisussaavoq.

Piniarneq uumasunik ilisimasallit innersuussutai aallaavigalugit ingerlanneqartassasoq inatsimmut nutaamut aamma siunnersuutigineqarpoq. Piniartulli isumaat taamatulli pingaruteqartigissasoq Aalisarnermut, piniarnermut nunalerinermullu ataatsimiititaliaq isumaqarpoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat