Sioorasaarineq allanngortitsinavianngilaq
-Sioorasaarinerup qanoq isikkoqarnera Danmarkimik allanngortitsinavianngilaq, ministeriuneq oqarpoq. Politiit isertortumik paasiniaasartut aningaasanik amerlanerusunik tunineqarnissaat pisinnaatitaaffilerneqarnissaallu ministeriunerup pisariaqarsorinngilaa.
Suliassap matuma ingerlanneqarnerani matumani pingaarnerpaatut paasinarsivoq iluameersunik isertortukkut paasiniaasartoqartugut, isertortumik paasiniaasartunik allanik suleqateqarluarnermikkut, matumanilu FBI-imik, peqqarniisaarniarnermik sioorasaarinermik qulaarsisunik, navialisoqaratarsinnaaneratalu pilinnginnerani annikillisitsisunik. Dansk Folkeparti tassaavoq, taakkua marluk tigusaareersullu PET-p amerlanerusunik sulisoqarnissaanik oqallinnermik aallartitsisoq.
Partiip assersuutitut tikkuarpaa inissiatut blokkit najugaqarfiit tamarmik tusarnaarneqarsinnaanerannut periarfissaq, ullumillu PET taamaaliorsinnaanngilaq. Dansk Folkepartip siulittaasua Pia Kjærsgaard oqarpoq:
Taamaattumik pisinnaatitaaffiit annertusineqarnissaannut amerlanerusunik aningaasaliisoqarnissaa periarfissaqarpoq, tassaavorlu tamanna oqallisissarput.
USA-mi eqqartuussiviup ualeru aalajangissavaa Danmarkimut peqqarniisaarniarnissamik pilersaaruteqartutut unnerluutigineqartup aappaa akiliuteqartitsinikkut iperagaassanersoq.
48-nik ukiulik Tahawuwur Rana tassaavoq pilersaarutinik ingerlatsisuullunilu isumassarsisuusoq. Tahawuwur Rana BMW-mik siilviusamik qasertumik biilerpoq Chicagollu kujataani kitaani Kinnsmannimi qaartartumik aqquserngup sinaanut inissittakkamik apersuilluni, taamaakkaluartorli tunuarsimaarpalulluni. Nipaatsorujussuuvoq inussiarnerlunilu, eqqaamiui Amerikamiut tusagassiortuinut oqarput. Rana niuertutut tatiginartutut ilisimaneqarpoq, ikittuinnaalli naluaat suliffeqarfia sumik siunertaqarnersoq. Avataaniit isigalugu nunanit allanit nunasisut pillugit suliffeqartittut isikkoqarpoq, nunap killeqarfiisa avataaneersunik suliffissarsiortunik ikiorsiisarfittut, politiilli oqarnerat malillugu suliffeqarfik Ranap allamorluinnaq atorpaa, tassalu peqqarniisaarniat ingasattajaarniartut siunertaannut angalanissaat pilersaarusiorlugit akilissallugillu.
Suliassami unnerluutigineqartup aappaata David Coleman Headley-ip Jyllands-Posten pulaaramiuk oqarpoq Ranap suliffiutaani atorfeqarluni. Taakkua marluullutik Pakistanimi sakkutuut atuarfianni imminnut ilisarisimapput marluullutillu tamaanngaanneerlutik. Headley isertortumik inuuvoq suliassallu kajungernanngeqisut suliarisarlugit, Ranali Amerikamiutut inuulluni arajutsisaqassanani aappamilu angalanissai pilersaarusiorlugillu akilertarlugit.
