Sinniisuuneq ilaasortat taperserpaat
AK akissuteqareesoq Kommuneqarfik Sermersuumi sinniisut pingasunngornermi ataatsimiipput tassanilu sinniisuunerup oqaaserisimasai taperserneqarput. Kommuunimi sinniisut sinniisuuneq pillugu Hammekenip oqaasii akuersaarumaneqanngillat inuttarsiuinertut nalilerneqarlutik. Panigpak Daoranap kattuffitsik isornartorsiorpaa qaammatini arlalinni sinniisut tamannarpiaq pillugu ataatsimiittareersut avammullu oqaaserineqartut ataatsimiissutaasunut naapertuuttut sinniisunit oqaatigineqarpoq.
Sinniisulli illuanik tupigusupput saaffiginnissutit kattuffimmiit qisuariarfigineqartarsimanngimmata, aammalu AK kommuunimilu sinniisut ataatsimiinnissaraluat taamaatiinnarneqarsimasoq innersuussutigalugu. Ataatsimiinnissaagaluaq taanna taamaatinneqarpoq AK takkutinngimmat naak Erik Hammeken aggerniarluni akuersisimagaluartoq. Tassani sinniisut ilinniartinneqartarnerisa amigaataanerat oqaluuserineqartussaasimagaluarpoq, sulilu ajornartorsiut tamanna atuuppoq.
Sinniisut erseqqissaatigaat Panigpak Daorana oqaaseqanngitsut imminut iluaquserniaannarluni, oqaaseqarnerali tassaasoq AKp oqalliseqataanissaataalernissaanut aallartitseriarneq sinniisut soqutigisaat qaqilerneqarniassammata. Tamanna AKp soqutigisimasariaqaraluaraa sinniisut isumaqarput.