Sinniisoqarfiup pisortaa Bruxellesimut nuulertoq

Tove Søvndahl Gant immikkut ilisimasalittut EU-p inuit pisinnaatitaaffii pillugit Bruxellesimi immikkoortortaqarfiani aggustip aallaqqaataani atorfinissaaq, tassanilu suliassat nuannarilluinnakkani ingerlatilissavai - nunap inoqqaavisa pisinnaatitaaffii:

- Naalagaaffiit Peqatigiit Nunat Inoqqaavisa pisinnaatitaaffiinut aalajangersagaat EU-p nunap inoqqaavi pillugit tunngaviusumik siunnerfimminut tapitartuussimanngilai, tamatumalu piareersaasiornissaa suliassama pingaarnersaraat, Tove Søvndal Gant oqarpoq.

Namminersulerneq, silaannaap allanngornera Naalakkersuisullu nikinnerat

Tove Søvndahl Gantip atorfininneranit ukiut arfineq marluk kingumut qiviaraanni sorpassuarnik pisoqarsimavoq. Namminersorneq pillugu Isumalioqatigiissitaq suliaminik naammassinnippoq, Namminersorneq eqqunneqarpoq, COP15 ingerlanneqarpoq naalakkersuisullu marloriarlutik nikipput. Qallunaat Nunaat nunarsuullu sinnera aamma aatsaat taama nunatsinni ineriartornermut ukkitarinnitsigilertut, Tove Søvndah Gant oqarpoq.

- Kalaallit Nunaannut Qallunaat Nunaanniit nunanillu tamalaanit soqutiginninneq piffissap sivikitsuararsuup iluani annertuseriarujussuarpoq. Tusagassiortorpassuarnit Namminersornerup eqqunneqarnissaa pillugu tassanngaannaq paasiniaavigineqartalerpugut. Suliassarpassuaqarsimavugut Kalaallit Nunaat pillugu paasisitsinerunissamut.

Tove Søvndahl Gantip sulinermini pingaartitaasa ilagisimavaat aallartitanut nunallu tamalaat tusagassiortuinut paasisitsiniaalluni ataatsimiisitsisarnerit. Taakkualu saniatigut aamma nunatta aallartitaqarfiata Qallunaat Nunaanni aningaasaateqarfiit nunatsinnut ilisimasaqarnerulernissaat pillugu sulissuteqarsimavoq.

- Qallunaat aningaasaateqarfiisa Kalaallit Nunaannut soqutiginninnerat piffissap ilaani annikilleriarsimavoq, kisianni maanna soqutiginninneruleriartoqqipput, tassanilu aallartitaqarfik pingaaruteqartumik inissisimasimavoq aningaasaateqarfiit suleqatigisinnaasaasalu attaveqatigiilernerannut.

Qallunaat Nunaannut attavilersorneq

Tove Søvndahl Gantip kingoraartissaminut siunnersuutissaqarpoq.

- Qallunaat Nunaata Kalaallillu Nunaata attaveqatigiinnerulernissaannut suli suliassarpassuaqarpoq. Qallunaammi Nunaata Kalaallillu Nunaata ataqatigiinnerani suli periarfissaqarpassuaqarpoq maannamit suli pitsaanerusumik atorluarneqarsinnaasunik.

Kalaallit Nunaata Københavnimi Sinniisoqarfianut pisortatut atorfik, septembarip aallaqqaataaniit kingusinnerusumiluunnit ivertittussamik, inuttassarsiorneqarpoq juulip 23-anut qinnuteqarfissaq killeqarluni.