Sinneqartuulaarpoq

Nunatsinni aningaaseriviup, BankNordikip, ukiumoortumik 2011-mi naatsorsuutit inerneri ippassaq saqqumiuppai, akileraarutillu peereernagit 14,1 millionit koruuninik sinneqartoorpoq, sinneqartoorutai ukiumi siuliani 16 millionit koruuniullutik.
Allattoq Carla Davidsen
marsip 21-at 2012 08:07

Aningaaseriviup, savalimmiormiunit aqunneqartup, taassuma, Savalimmiuni Danmarkimi Nunatsinnilu immikkoortortallip, 30,7 millionit koruunit katillugit inernertut tassa saqqummiuppai.

Ukiumut naatsorsuutit 2 millionit koruuningajalluinnarnik appariarnerat - tassa 16 millionit koruuniniit 14,1 millionit koruuninut - sulisut allaffissornerullu aningaasartuutigineqarnerulernerinik pissuteqartut, tusagassiuutinut nalunaarummi erserpoq.

Aningaaserivik Nunatsinni pingasunik maannamut immikkoortortaqaraluarpoq. Sisimiunili Ilulissanilu immikkoortortai upernaaru maajip ulluisa aallaqqaataanni matussapput, Nuummiittoq ammaannassalluni.

Aningaaserivimmit oqarnerat naapertorlugu, atuisut aningaaseriviup netbankia atorlugu aningaasanik namminneq tigusisarnerat immikkoortortat marluk matusariaqarnerannut pissutaavoq.

- Taamaammat immikkoortortaqarnissaq pisariaqarpallaarunnaarpoq. Aningaaseriviup suliai aningaaserivimmi ataatsimoorunik ajunnginnerussaaq, aningaaserivimmi aqutsisut ukiumoortumik naatsorsuutit inerneri pillugit nalunaarummi ilanngullugu allapput.