Sinneqartoorutit akissarsiat qaffanneqarnissaannut SIK-p atorusukkai
Nunatta karsiata naatsorsuutaanngitsumik sinneqartooruteqarnera nuannaarutissaagaluartoq, SIK-p siulittaasua hurraartorpallaanngilaq.
- Nuannaarutissaagaluarluni, kisianni taakku 51 millionit koruunit annertuutut oqaatigineqarsinnaanngillat. Kissaatikka qangali nungoreerpakka taakkua marluk taaginnarlugit, SIK-p siulittaasua, Jess G. Berthelsen taama oqarpoq.
51 millionit koruunit sumut atorneqarsinnaanerinik kissaataa siulleq tassaavoq sulisartut aningaasarsiaasa ukiuni pingasuni qaffanneqarnissaat.
- Pingaarnersiuissaguma oqarlungalu ilaasortatta aningaasarsiaat qaffattariaqarput. Taava ukiunit pingasunut taakku atorniarpakka. 34 øriinnaavoq akunnermut.
AAMMA ATUARUK Bankimi pisortaq aaqqissuusseqqinnissamik kaammattuuteqartoq
Grønlandsbankilli pisortaa isumaqarpoq aningaasarsiat qaffannissaat massakkorpiaq piffissaanngitsoq.
- Kalaallit Nunaanni unammillersinnaassusermut sunniuteqalaassagunarpoq, taamatullu inissisimanermi naapertuutinngilaq. Assersuutigalugu ilinniarsimassuseq qaffassarlugu ungasinnerusumut aningaasaliiffigigaanni tamassuma ungasinnerusumi akissarsiat qaffassitsissavai, maannakkorpiarli tamanna eqqortuugunanngilaq, GrønlandsBankenip pisortaanera Martin Kviesgaard taama oqarpoq.
AAMMA ATUARUK Nunatta karsia sinneqartooruteqarpoq
SIK-p siulittaasuata GrønlandsBankillu pisortaata siunnersuutaat assigiinngeqaat. Bankip pisortaa isumaqarpoq siunissaq ungasinnerusoq isigalugu aaqqissuusseqqinnissaq pisariaqartoq.
- Nammanneqarsinnaasumik ineriartussagutta taava ungasinnerusoq isigalugu aaqqissuusseqqissaagut. Naalakkersuisut aaqqissuusseqqinnissartik pilersaarutigimmassuk, soorunami nuannaarutissaavoq, taavalu taakku qanoq naammassineqarnissaat takussallugu pissanganartuuvoq, Kviesgaard taama oqarpoq.
