Assi: Kalaallit Airports A/S

Mittarfiliornissaq: Sinneqartoorutinit aningaasaliissuteqarusuttut

Nuummi Ilulissanilu mittarfiit tallineqarnissaannut Qaqortumilu nutaamik mittarfiliornissamut 3,6 milliardit koruunit atorneqassapput. Naalakkersuisulli 1 milliardi milliardilluunniit aappaata affaannik aningaasaliissuteqaannarsinnaapput, sinnerilu taarsigassarsiaassapput.

Naalakkersuisut Nuummi, Ilulissani Qaqortumilu mittarfiliortitsinissaminni qanoq aningaasalersuissanerlutik takorloorneritsik aningaasanut inatsisissatut siunnersuummi saqqummiuppaat.

Mittarfiit tallineqarnissaannut nutaamillu mittarfiliornissamut 3,6 milliardit koruunit missaat atussavaat. 

Namminersorlutillu Oqartussat, soorlu assersuutigalugu illumik umiatsiamilluunniit pisinermi taamaattoqartartoq, namminneq tigutsiseqassapput sinnerilu taarsigassarsiaassapput.

AAMMA ATUARUK Kalaallit Nunaanni mittarferujussuaq ataaseq naammappoq

Taarsigassarsiniarsinnaalerumallutilli 1 milliardit milliardillu aappaata affaasa akornanni tigutsiseqarnissartik siunniuppaat.

Mittarfiliornissamik pilersaarusiortumut Kalaallit Airportsimut 300 millionit koruuningajaat aningaasaliissutigineqareerput. 

Taassuma saniatigut TELE-POST-ip Air Greenlandillu iluanaarutaannik PFA Soraarnermiillu isertitassanit ataasiartaasunit pissarsinissaq kissaatigaat.

AAMMA ATUARUK Sanaartorujussuarneq akisunaarneqarlunilu kinguaattoorutaasinnaasoq

Taavalu aamma sanaartornissamut ukioq manna aappaagumullu aningaasaliissutit atunngitsuukkat nunattalu karsiata 2016-imi, 2017-imi 2018-imilu sinneqartoorutai tamakkivillugit aningaasaliissutaanissaat, Naalakkersuisut kissaatigaat.

Namminersorlutillu Oqartussat aningaasartuutaasussat amerlanerit namminneq pissarsiarisinnaagunikkit, ikinnerusunik taarsigassarsisinnaalissapput, taamaaliornikkullu pilersaarutit imminnut akilersinnaanerulissapput, bilitsillu siunissami akikinnerussasut, siunnersuutip nassuiaataani allaqqavoq. 

Aningaasartuutaasussallu affai pissarsiarineqarpata sanaartortoqalersinnaassaaq. Aningaasallu sinneri sanaartornermi pissarsiarineqassasut, Kalaallit Airports A/S allappoq.

AAMMA ATUARUK Imminut akilersinnaanngitsunut aningaasaliinaveersaartariaqarpugut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat