Sinneqartooraluarlutik ernumapput
Sinneqartoorutit akileraarutit peereerlugit 21,8 millionit koruuninik amerlassuseqarput, naak immiaaqqat tunisat 3,5 procentimik sodavandinillu tunisat 4 procentimik ukiup siulianut naleqqiullugit appariaateqaraluartut.
Nuuk Imermi ippassaq ataatsimeersuartoqarnerani tamanna erserpoq, peqatigitillugu Nuuk Imermit KNI-mut siammarterinissamik isumaqatigiissutaata ukiorpassuani atuuttup Unammilleqatigiinnermut Ataatsimiititaliamit unioqqutitsisutut ukiup aallartilaarnerani aalajangiiffigineqarnera siulersuisunit pakatsissutaavoq.
Nunatsinni puiaasaaqqanik utertitsisarnerup ingerlalluartup ajutoortinneqarsinnaanera aalajangernermi aarleqqutigineqarpoq.
Kalaallit Nunaanni avatangiisit mingutsinneqannginnissaannut puiaasaaqqanik utertitsisarnerup iluaqutaassusia, Nuuk Imermit tikkuarneqarpoq. 2010-mi puiaasaaqqat utertinneqarsimasut katillugit 98,6 procentiupput. Tassa imaappoq suliffeqarfiup puiaasaaqqat sinerissamut nassiussuuttagai tamangajalluinnarmik utertarput.
Utertitsisarnermik aaqqissuussinerup tunngavia atorunnaarsinneqassappat tamanna suliffeqarfiup matuneqarneranik kinguneqarsinnaasoq, Nuuk Imermit isumaqartoqarpoq. Suliffeqarfik Unammilleqatigiinnermut Ataatsimiititaliap aalajangiinera tunngavigalugu allatut siammarterisarnissamik ineriartortitsinialerpoq.