Sinn FéinSinn Irlandimi qinersinermi partiini annerpaanngortoq
Irlandimi partii saamerlerneersoq Sinn Féin, Irlandimi inatsisartunut arfininngormat qinersinermi partiini annerpaat tullinngorpoq.
Sinn Féin, Irlandimi inatsisartuni inissat 160-it akornanni 37-nik ilaasortaatitaqalerpoq.
Irlandimi inatsisartunut arfininngornermi qinersinermi inernerit marlunngornermi ullaakkut saqqummiunneqartut tamanna takutippaat.
Aatsaat taama angusarissaartigisoq
Sinn Féin Irlandimi inatsisartunut qinersinermi aatsaat taama angusarissaartigaaq, partiillu allat angusarisaat aallaavigalugit naalakkersuisoqatigiiliornissaq ajornakusoorsinnaalluni. Nutaarsiassaqartitsivik Reuters taama allaaserisaqarpoq.
Partii qiterliunerullunilu talerperliusoq Fianna Faíl 38-nik ilaasortaatitaqalerpoq, Irlandillu ministeriunerunerata, Leo Varadkarip, partiia Fine Gael 35-nik ilaasortaatitaqalersoq.
Partiit taakku marluk, Fianna Faíl aamma Fine Gael, Irlandimi politikkikkut ukiorpassuanngortuni naalakkersuisuutitaqartuusimapput. Partiilli taakku marluk Sinn Féin peqatigalugu naalakkersuisoqatigiiliornissamut maannamut tunuarsimaarsimapput.
Sinn Féinilli siulittaasuata, Mary Lou McDonaldip, Sinn Féin naalakkersuisoqatigiinnut ilaalernissamut piareeqqasoq qinersinerup aqaguani oqaatigaa.
Sinn Féin, Tuluit Nordirlandimi aqutsinerannut akerlilersuisut IRA sinnerlugit politikkikkut suliniuteqartuuvoq.
Irlandip Nordirlandillu ataatsimut kattuteqqinneqarnissaat Sinn Féinip pingaarnerit ilaattut anguniagaraa.