Sinersortaasiisoqarnissaanut aningaasanik ersittoqanngilaq

Siumut partiip aasaq manna juulip naalernerani ataatsimeersuarnerani Siumukkormiut amerlanerussuteqartut piumasaqarput angallannermik siorna allanngortiterineq innuttaasunut eqquisoq kukkunerusutut nassuerutigineqartariaqartoq iluarsiivigineqarlunilu.

Angallannermik allanngortiterigaluarnerit ukioq nutaamiit iluarsiivigineqassasut Naalakkersuisut siulittaasuat Hans Enoksen ataatsimeersuarnermi neriorsuivoq.

Sinersortaaseeqqissinnaanermulli tunngasunik Aappaagu 2008-mut Inatsisartut Aningaasanut Inatsisissaanni ersittoqanngilaq.

Taamaallaat aningaasanut inatsisissatut siunnersuummi allaqqavoq, Upernavimmi, Uumaannami, Nanortalimmilu angallannermut kiisalu Kangilinnguit timmisartukkut sullinneqarnerannut immikkut tapiissuteqarneq pissutigalugu ukiuni 2008-miit 2011-mut tapiissutit ukiumut 10,9 millioni koruuninik qaffaavigineqassasut.

Angallannermut Naalakkersuisoq Kim Kielsen juulip naalernerani nalilersuereerluni oqarpoq, sinersortaasiinissamut Nunarput akissaqanngitsoq, angallannermullu annertunerusumik aningaasaliisoqaqqissappat suliassaqarfinni allani aningaasaliissutissanik ilanngarterisoqartariaqassasoq.