Sinerissap qanittuani kinguppanniartut inatsimmi periarfissinneqarput

Inatsisartut ippassaq immikkut aalajangiinerisigut kilisaatit avataasiutit pisassaralui kinguppanniutinut minnerumaanut tunniunneqarsinnaalerput.

Sinerissap qanittuani kinguppanniartut pisassatik nunguleraangatigit, soorlu ullumikkut taamaattoqartoq, taava avataasiutinut pisassiissutigineqaraluartut ilaat taakkununnga tunniunneqarsinnaalerput.

Sinerissap qanittuani kinguppanniartut pisassatik nunguleraat, inuussutissarsiutiminnillu annaasaqarsinnaanerat aarlerinarsinnaasoq Aalisartut Piniartullu Kattuffiata ungasingitsukkut nalunaarutigimmagu, inatsisartuni allannguisoqarpoq.

Aalisarnermut inatsisip allanngortinnissaa Siumup oqaaseqartartuata, Lars-Emil Johansenip isumaqatigalugu saqqummiummagu Inatsisartut amerlanerussuteqartut isumaqatigaat.