Sinerissap qanittuani aalisartut eqqugaannginnissaat anguniarlugu naalakkersuisut saaffigineqassamaarput

Ikummatissat akitsornerat aalisartunut eqquinerlussaaq Uuliap 50 oorimik akitsornera aalisartunut piniartunullu annertuumik eqquinerlussasoq, KNAPK-mit isumaqarfigineqarpoq.
Allattoq Jaaku Lyberth
juulip 01-at 2008 17:01

Sinerissap qanittuani aalisartut tulaassuisussaatitaanerat aallaavigalugu eqqugaannginnissaat anguniarlugu, kattuffik naalakkersuisunut saaffiginnilersaarpoq.

- Tassanngaannarsuaraasiit ippassaq pisoqariataarpoq. 50 oorersuarmik ikkummatissaq akitsorneqarpoq, takusinnaasaralu malillugu sakkortoorujussuarmik piniartunut aalisartunullu eqquisussaavoq, taakkuummatami ikummatissarujussuaq atorlugu inuussutissarsiutiminnik ingerlatsisut, KNAPK-p pisortaa John Biilmann oqarpoq, nangillunilu:

- Naalakkersuisunut saaffiginniniarpugut, aalisartut piniartullu akitsuinermi ilannguteqqunagit, pissutigalugu Naalakkersuisut sinerissap qanittuani aalisartunut tulaassuisussaatitaanermik piumasaqaateqarnermikkut akisussaaffeqarlutik, tulaassuisut uummatigisinnaasaannik akilersinnaasumik ingerlatsinissaannut qulakkeerinneqataasariaqarmata, KNAPK-p pisortaa, John Biilmann oqarpoq.

Taassuma ilanngullugu oqaatigaa, 2009-p 2010-llu akornanni ikummatissamik akitsuinissaq aatsaat pisussatut ilimasaarutaasimagaluarluni tassanngaannangaarmat, aningaasanngorlugu qanoq naleqassanersoq oqaatigisinnaanngikkallarlugu. Aalisartut angallatiminnik aserfallatsaaliinissaminnut eqqorneqassasut, John Biilmann-ip aamma ilimagaa.