Sinerissap qanittuani aalisarnerup ilaa akitsuusersorneqassanngitsoq
Allannguutissatut siunnersuut akuersissutigineqassappat, sinerissap qanittuani aalisartut 4,4 millionit koruunit missaannik akitsuutitigut akiliisassanngillat. Naalakkersuisut aningaasat taakku akitsuutip qaffasinnerpaaffissaata 17 procentimit 17,5 procentimut qaffanneratigut matussuserniarpaat.
Siunnersuutip ataasinngorpat pingajussaaneerneqarnissaanut Naalakkersuisut allannguutissatut siunnersuutaanni tamanna atuarneqarsinnaavoq.
Tassalu avataasiortut ingammillu raajarniartut qaleralinniartullu akiliinerusalissapput. Taakkunanimi ingerlatseqatigiiffiit akileraareerlutik 4,5 millionit koruuninik aningaasartuuteqarnerusalissapput.
AAMMA ATUARUK Akitsuutit nutaat aalisarnerup iluani akissaqartinneqarput
Isumalluutinik akitsuusersueriaaseq nutaaq nunatta karsianut 50 millionit koruunit missaannik isertitsissutaassaaq. Akitsuutillu aningaasanut inatsisip oqimaaqatigiisitsiffiunissaanut pisariaqartut aningaasaqarnermut naalakkersuisup, Aqqaluaq B. Egedep Inatsisartunut siusinnerusukkut nassuiaatigereerpaa.
Naalakkersuisoqatigiit allannguinissamik kissaateqartut
Sinerissap qanittuani saarullinniarnerup, saattuarniarnerup nipisaallu suaannik aalisarnerup killeqangaatsiartut ilaatigut naapertuutinngitsumik akitsuuteqartinneqarnerat pillugu naalakkersuisoqatigiinni oqallinnerit kingunerisaannik allannguisoqartoq, siunnersuummi allaqqavoq.
Avataasiorluni aalisarnermi piginnittut inuussutissarsiornerminni akuerinartumik iluanaaruteqarnissamut aningaasaliinissamullu periarfissaat ajornerulersinngikkaluarlugit akitsuutinik qaffasinnerusunik akiliisinnaassasut Naalakkersuisut naliliipput.
AAMMA ATUARUK Aalisarnermi akitsuutit nutaat isornartorsiorujussuarneqartut
Akitsuutinik qaffaaniarneq avataasiortunit sakkortuumik isornartorsiorneqareerpoq.
Uiluinnut akitsuutip allanngortinneqarnissaa aamma siunnersuutigineqarpoq, tassalu uiluinnut akitsuutip aalajangersimasumik 5 procentiunissaa siunnersuutigineqarluni.
Aningaasaqarnermut akileraartarnermullu ataatsimiititaliami amerlanerussuteqartut allannguutissatut siunnersuut taperserpaat.
AAMMA ATUARUK Snak om brandbeskatning er ikke på sin plads