Sinerissamit ilinniariartortut ilaquttatik nooqatigisinnaanngilaat
![](/sites/default/files/styles/image_934x467/public/article_images/kollegie_narsaq.jpg?itok=hUtCj9IE)
Nuummi ilinniarfeqarfinnut allagaqaat malillugu, ilinniartup kisimiilluni nuunnissaa salliutinneqarpoq, taamaattumillu ilaqutariit inissaannik nassaartoqarnissaata tungaanut ilinniartup ilaqutai angerlarsimaannaqqaartariaqarlutik.
Hanne Søgaard Ilisimatusarfimmi ilinniakkanut pisortaavoq. Taassuma nutaamik suliniuteqartoqarneratigut ilinniartut ineqarfiinik ajornartorsiummut aaqqiissutaanissaa ilimaginngilluinnarpaa.
- Utoqqatseraluarpunga taama oqassagama, kisianni uanga isumaga naapertorlugu tamanna nikanartumik aaqqiineruvoq. Tuaviuussamik aaqqiineruinnarpoq sumut aaqqiissutaanavianngitsoq. Tassa qiiarusunngikkaanni iloqqutsisariaqarpoq-mik oqartarnermut assinnguvoq. Sumulluunniit iluaqutaanngilaq. Ajornartorsiutinik nutaanik allanik pilersitsiinnassaaq, Hanne Søgaard oqarpoq.
Ilaqutariit sumiiffimminni nutami ajunngitsumik aallartinnissat taassuma pingaarteqaa, Taamaammallu ilinnialersussat ilaquttatik qimakkallarlugit ilinniariartarnissaannik aaqqiineq iluaringilaa:
- Taamatut aaqqiissuteqarneq iluaqutaanngilaq, ilinniakkap arlaleriarlugu taamatinneqaneranik kinguneqarsinnaavoq, ilaqutariillu ataatsimoornissaat pisariaqarnerpaaffianiittarpoq tamannalu aallaqqaaniit pinissaa pingaaruteqarluni, Hanne Søgaard oqarpoq nangillunilu.
- Ilinniartut ilaquttatik ilaginagit ilinniariartortillutik ilinniakkaminnik aallartinnerlussinnaasarput.
Taavalu aamma ilinnialersoq suliffimminut atatillugu ineqareersimaguni, ilaquttani qimatani qanoq pissanersut isumakuluutigisinnaasarpai, Hanne Søgaard oqarpoq.
- Taava imminut aperivunga aamma ilinniartitaanermut Naalakkersuisoqarfik aperivara, ilinniagaqalersup ilaqutai Nuummut nuunnissamik tungaanut sumi najugaqassapppat? Ilaqutariimmi suliffigisamit soraarnerup kingorna sulinermut atatillugu inigisaminniiginnaarsinnaanngillat, ilinniakkanut pisortaq oqarpoq.
Ilinniartut ineqarfiisa allaffeqarfiat aqqutigalugu inissarsiortut juulip aallaqqaataani 120-t nalunaarsorneqarsimapput. Tassani pineqarput Nuup avataaneersut ilinniariartut. Taakunannga ilinniagaqartut 45-t meeraqarput ilaqutaqarlutilu. Malittarisassat nutaat atuutilernerisigut taakkununnga kingunerisassai Hanne Søgaardip ernumanartoqartippai.
Ilinniagaqarniartut ikileriasaarsinnaapput. Ilaquttatik ilaginagit ilinniarniartut iliniarnertik unitsissinnaavaat.
Ilinniagaqartut 120-iusut affaasa missaaniittut inissarsipput, siornamullu sanilliullugu pitsanngoriarneruvoq.
Affaasali sinneri qanoq iliussanersut Hanne Søgaardip isumalluarnartoqartinngilaa.
- Ilinniagaqarniarlutik qinnuteqartut affai ajornartorsiutigilissavagut. Tamanna ilinniartut ineqarfiisa allaffeqarfiata ulluinnarni attavigisarnerani malugisinnaavara. Taakkua isertuunnagu oqaatigaat sukaterisoqartariaqartoq.