Sinerissami pisoqaaluppoq
Sinerissami politeeqarfinnut paasiniaanitsinni amerlanerpaat eqqissisimaffiusimasut paasivarput. Pisoqarfiusimasulli arlaliupput. Kujataani aallarteriarta.
Piniartoq Alluitsup Paamioq sikorsuit akornannit anillakaassinnaajunnaarsimasoq, nunaqarfimmiit takuneqarsinaammat Nanortalimmi politiinut ippassaq ualikkut tallimanngorluinnartoq ajornartorsiornera nalunaarutigineqarpoq. Sikorsuaqaqimmat taarsileriivimmallu angallammik qulimiguulimmilluunniit aallartitsisoqarsinnaasimanngilaq. Alluitsup Paanili qatserisartut sisamaallutik ippassaq unnukkut sapiiseqalutik annaassiniariartorsimapput, anorlileriartoraluartorlu sikorsuit akulloqquallugit angut qiulivissoq ullaassaq nalunaaqutaq marluk qeqqarluinnartoq annaassinnaasimavaat. Nanortalimmi politiit iluatsitsineq nuannaarutigaat, oqaatigaalli piniartoq radioqaranilu mobilimik nassataqarsimanngitsoq.
Kujataaniiginnarallassaagut. Narsarsuarmi nanorsiulersimagaluarput. Nannup tumai takuneqarsimapput, Narsarsuarmiillu ungasiartumi nanuusorisaq takuneqarsimavoq, sunaaffa angutikuloorsuaq.
Nunatta qeqqani Maniitsumi tillinniarneq sapaatip-akunnerata naanerani aamma pisimavoq, orsersortarfimmi matu aserorlugu tillinniartoqarsimalluni. Aningaasanut karsimiittut 2.663 koruunit tillinneqarsimapput. Maniitsumi politiit ilimagaat kina tillinniartuusimanersoq ingerlaannakanneq paasineqarumaartoq.
Avannarpariarutta oqaatigisinnaavarput, Qeqertarsuarmi allamik pisoqarsimanngimmat, taamaallaalu eqqartuussivimmut angutinik marlunnik ullut 14-it matuma siornagut persuttaasimasunik sassartitsisoqarsimammat.
Angutip aappaa inuusunneq 20-inik ukiulik qaammatini pingasuni, ilaatigut toqqusassiisimanini pillugu pinerluuteqarsimasunut inissiisarfimmiittussanngortinneqarpoq, akuerineqartumik.
Sassartinneqartup aappaa angut, siornatigut 15-eriarluni oqaatigineqartaraluarluni 13-eriarluni persuttaasimasutut pinngitsuutinneqarsimasoq, ulluni 40-ni pinerluuteqarsimasut inissiisarfianiittussanngortinneqarpoq. Qeqertarsuarmili politiit tamanna naammaginngilaat, ukiup affaanik sivisutigisumik pineqaatissinneqassasoq piumagaluarlugu, taamaattumik suliaq Nunatta Eqqartuussivianut suliassanngorteqqinneqarpoq.
Nunatta avannaarsuani pisoq kinngulliutissavarput Qaanaami pisiniarfimmi imigassanik assigisaanillu tallimanngormat tillinniartoqarpoq, kikkulli taamaaliortuunersut ingerlaannaq politiit paasimmassuk tillitat arsaarissutigineqarput.
