Sinerissami nakkutilliissutit sungiusaqatigiittut

Kangilinnguani sakkutooqarfiup sinerissami nakkutilliissutaa Ejnar Mikkelsen umiarsuarnik ajutoortunik annaassiniarmik pisuusaartitsilluni ulluni makkunani sungiusarpoq, sungiusarnermi amerikamiut sinerissami nakkutilliissutaat Willow peqataavoq.
Assi © : Lena Math
Allattoq Jaaku Lyberth
aggustip 23-at 2011 07:55

Annaassiniarnermik sungiusarneq taaguuteqartinneqarpoq Northern Deployment 2011.
Sungiusarnermi kitaata avannaani umiarsuarnik angallaffiusinnaasut killingat aallarniutigineqarput, sermit iigartartut Peterman aamma Humbolt saneqqullugit.

Umiarsuit taakkua sungiusarlutik ingerlaanerminni ikioqatigiipput.
Sungiusarneq naammassineqarpat, angusat Pituffimmi sakkutooqarfimmi nalilersorneqassapput.
Pituffimmi atortut misilittarneqassapput, umiarsuarmi ajutoortumi ilaasut annaanniarneqarnerinik pisuusaartitsisoqassalluni.

Sungiusarneq Canadamiut sinerissamik nakkutilliisussutaata 2009-mi taavani sungiusarneranik nangitsineruvoq.

Arktisk Rådimi ilaasortat nunanut allanut ministeriisa Nuummi maajimi ataatsimiinneranni issittumi nunat annaassiniarnermik ujaasinermillu suleqatigiinnissaannik isumaqatigiissuteqarnerup kingorna, annaassiniarluni sungiusarnerit aallartipput.

Umiarsuit Ejnar Mikkelsen aamma Willow ullumimiit angalaqatigiillutik aallartipput, sungiusarnermilu nalilersuinerit Pituffimmi sakkutooqarfimmi sisamanngornermi aggustip ulluisa 25-anni pissapput.