Sinerissami inissiat aaqqissuussaasumik iluarsaanneqartussanngorput

Aningaasat 22 millionit koruunit INI A/S-i-miit immikkut ittumik iluanaarutitut naatsorsuutigineqartut sinerissami iluarsaassinernut aappaagumut immikkut atugassanngortinneqartussanngorput.
Allattoq Louise M. Kleemann
novembarip 07-at 2011 09:03

A/S INI 2012-imi perngaammik immikkut ittumik iluanaaruteqartussatut naatsorsuutigineqarpoq. Taamaattumik INI-miit iluanaarutissatut naatsorsuutigisat taakku sinerissami iluarsaassinernut immikkut atugassanngortinneqassasut, Naalakkersuisut 2012-imut aningaasanik inatsisissamut siunnersuutigaat.

Nuummi Tuapannguani napasuliarsuarni sulisunut inissiat tuniniarneqarnissaat  naalakkersuisut aamma siunnersuutigaat, napasuliarsuit ataasiakkaarlugit 2014-ip tungaanut ukiumut tuninerisigut Nunatta Karsia 15 millionit koruuninik iluanaaruteqarsinnaammat. Tunisinermit isertitat inissiat aaqqissuussaasumik iluarsaanneqarnissaannut  immikkut atugassanngortinneqarnissaat siunnersuummi ilaatinneqarpoq.

Taamaalilluni sinerissami iluarsaassinernut aningaasaliissutit 2012-imi 37 millionit koruuninik aamma 2013-imi 2014-milu ukiuni ataasiakkaani 15 millionit koruuninik qaffanneqassallutik.

2012-mut aningaasanut inatsisissatut siunnersuut Inatsisartuni aappassaaneerlugu ullumi oqaluuserineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq