Sinerissami aqqanernut qinersinerup ingerlanera

Ilulissani silagissuuvoq, ullaarlu qinersiartortut amerlasimasut, qinersinermi aqutsisoq Katrine Rosbach oqarpoq. Ilulissani qinersisinnaasut 3.112-iupput, qinersisinnaasullu 13,1 procentii aqqanernut qinersiartorsimapput. Qinersineq pisarnertut ingerlavoq, qinersivinnili qinigassanngortittut allattorsimaffiisa mikineri pissutigalugit, qinersivinni allisitsiutinik ilioraasoqarsimasoq Katrine Rosbach oqaluttuarpoq.

Sisimiuni silagissorsuugaluartoq aqqanernut qinersiartortut 2001-mit ikinnerulaartut, qinersinermi aqutsisoq Karl Berthelsen oqarpoq. 2001-mi aqqanernut qinersiartortut 10,62 procentiusimapput, ukiormannalu 9,37 procentillutik, tassa 1,25 procentimik ikileriarsimagamik. Sisimiuni qinersisinnaasut 3.630-put. Karl Berthelsen-ip ilanngullugu oqaatigaa, qinigassanngortittut allattorsimaffiisa mikisunnguanik allaqqaneri pissutigalugit isigiarsuttut taasileraangamik ikiorneqartarsimasut.

Tasiilami aamma silagissuuvoq. Tamannalu qinersisut amerlanerinut pissutaasoq Johannes Kalia qinersivimmi aqutsisoq oqarpoq. Inuusuttorpassuit qinersiartorsimapput, siullermeerlutillu qinersisut aamma amerlasimasullutik. 2001-mut sanilliullugu 2005-mi qinersiartortut 5 procentingajammik amerlanerupput, tassa ukiormanna 17,17 procentit qinersiartorsimammata 2001-milu 12,73-iusimallutik. Tasiilami qinersisinnaasut 1.159-iupput.

Qinersisitsisut nassuiaapput qinigassanngortittut allattorsimaffiisa mikinerinut pissutaasoq, aatsaat misilinneqarmat qinigassanngortittut allattorneqarsimagamik, siornatigut taasisup qinerniakkani nammineq allataaraluaraa, taamaammallu isigiarsuttunit qinigassanngortittut allattorsimaffii takujuminaatsut.