"Kalaallit Rangers"-inik pilersitsisoqarnissaanut Siumup tamanna qineqqusaarutigimmagu Naleqqap siulittaasuata Pele Brobergip tupigusuutigaa.

Najukkami upalungaarsimasut 'Kalaallit Rangers'-it aalisartunik piniartunillu ilaaffigineqartoq sineriammi nakkutilliinermut ikiuunnissaat siunnersuutaavoq. Taakku "Greenland Rangers-inik siornatigut taaguuteqarput.

Taamatut Rangerseqartitsineq Canadami Islandimilu ilaatigut atuutsineqarput, taamatullu nunatsinni aaqqiisoqarsinnaanera arlaleriarluni oqaluuserineqareerluni.

Taamatullu siunnersuuteqartoqarnera Pele Brobergip nuannaajallaatigaa. Naleqqqammi taama aaqqiisoqarsinnaanera arlaleriarlutik siunnersuutigisareerpaat, partiiniilli allanit tapersersorneqarnatik, Naleqqap siulittaasua oqarpoq.

- Tamanna arlaleriarluta oqaluuserereerparput, taamatulli aaqqiisoqarsinnaanera amerlanerussuteqartunit tapersersorneqartarani. Tamannali pillugu maanna allanngortoqarnera nuannaarutissaavoq, Pele Broberg oqarpoq.

USA-p Danmarkillu illersornissamut isumaqatigiissutaata inatsisartut 2023-mi ukiaanerani  ataatsimiinnerisa nalaanni oqaluuserineqarnerani isumaliutissiissut Pele Brobergip innersuussutigaa. Najukkami upalungaarsimasut sinerissamik nakkutilleeqataasussat pillugit Naleraq taamanikkut siunnersuuteqarpoq, Islandimi aaqqissuussinertut ilusilimmik pilersitsisoqarnissaa siunnersuutaalluni.

Issittumi Sakkutooqarfimmi sulisut kalaallinik taarserneqarnissaat tassani aamma siunnersuutaavoq, SAR-imik assigisaannillu nammineq akisussaaffeqarsinnaanerput siunnersuutaalluni.

Issittumilu Sakkutooqarfiup Kalaallit Nunaanniinnginnissaanik tamanna isumaqanngitsoq, Pele Brobergip erseqqissaatigaa.

- "Kalaallit Rangers"-inik pilersitsisoqarpat imaanngilaq Namminersorlutik Oqartussat ataanni taakku inissisimassasut, taanna isumaqarpoq.

Tapersersorneqarneq

Nunanut allanut naalakkkersuisuunermi nalaani najukkami upalungaarsimasunik Kalaallit Nunaanni sinerissamik alapernaarsuisoqarsinnaaneranik pilersitsisoqarsinnaanera pillugu USA-mit 2023-mi apeqquteqaateqartoqartoq Pele Brobergip ilanngullugu ilisimatitsissutigaa.

"Rangers"-inik pilersitsisoqarsinnaaneranut atatillugu partiit marluk taakku isumaqatigiinnerat Brobergip taamaammat nuannaarutigaa. Apersorneqarnerminullu ilassuteqarnissani pillugu KNR-imut saaffiginneqqinnissani taassuma aamma tunuarsimaarfiginngilaa:

- Ataatsimoornermik takutitsisoqarnissaa naalakkersuisoqatigiit oqaatigaat. Naleqqallu polikkia pillugu ataatsimoortoqarnera taamaammat nuannaarutigaa, taanna qungujulluni oqarpoq.

Naalakkersuisut, Danmarkimilu naalakkersuisut Canadalu illersornissaq pillugu qaammatip siuliani isumaqatigiissusiormata "Rangers"-inik pilersitsisoqarsinnaanera tassani aamma oqaluuserineqarpoq. Canada peqatigalugu misilittakkanik paarlaasseqatigiittoqarsinnaanera, nunanut allanut naalakkersuisup Vivian Motzfeldtip taamanikkut nuannaarutigaa.

Najukkami sinerissamik alapernaarsueqataasinnaasunik pilersitsisoqarsinnaanissaanut eqqarsaatip pingaartumik Tunumut pingaaruteqarsinnaanera, Danmarkip illersornissamut ministeriata Troels Lund Poulsenip KNR-imit apersorneqarnermini siusinnerusukkut oqaatiginikuaa.

Siumut sinnerlugu Folketingimut qinigassanngortittoq, "Kalaallit Rangers"-illu pillugit siunnersuusiortoq Ane Lone Bagger apersussallugu KNR-ip suli pissarsiariniarsaraa.