Sinerissami aalisartut qanittumi kisimi aalisarsinnaalissasut
Inatsisissatut siunnersuummi aalisartut aningaasaqarniarnerat aamma sinerissamut qanittumi qaleralinniarnermi pisassiissutit sinninnginnissaat qulakkeerniarneqarpoq.
Naalakkersuisulli imminnut akerleriittunik suliniuteqarnerarlugit isornartorsiorneqarput.
Inatsimmi nutaami sinerissamut qanittumi aalisartut ikilinissaat, taakkuli aningaasarsiorluarnerunissaat Naalakkersuisut qulakkeerniarpaat.
Aalisarnermut Naalakkersuisup Karl Kristian Krusep taamaalilluni pisassiissutit sinnerneqartannginnissaat neriuutigaa.
Naalakkersuisut erseqqarluttumik politikkeqarnerarpaat
Naalakkersuisulli erseqqarluttumik politikkeqarnerarlugit, Kommuneqarfik Sermersuumit, Sulisitsisunit SIK-millu isornartorsiorneqarput.
Taakkua taamaalillutik tikkuartorpaat inatsimmik allannguineq aalisarnermut aningaasaliissutinut immikkoortitat allanngorteqqinnissaannik pilersaarut aamma sinerissamut qanittumi qaleralinniarneq pillugu pilersaarut naatsorsuutigisamit killormoortumik sunniuteqassasoq.
Inatsisartut aalisarnermut ataatsimiititaliaata tamanna aamma ernummatigaa, 2015-imummi pisassiissutini biologit innersuussutigisaannit 40 procentinik amerlanerusunik pisassiisoqarniarmat.
Ataatsimiititaliami ilaasortap Inuit Ataqatigiinneersup Ane Hansenip tamanna Naalakkersuisut eqqumaffigisariaqaraat isumaqarpoq.
- Naalakkersuisut inassuteqarfigeqqiinnartariaqarpagut taakkua ilisimatuussutsikkut ilisimatusarnikkut taavalu nalunaarsuutit aallaavigalugit nalilersuutit tunngavigalugit ukiumiit ukiumut pisassiinerit ingerlanneqartassasut sapinngisamik taakkua iluanni.
Taamaakkaluartorli inatsisip allanngortinneqarnissaanut Aalisarnermut ataatsimiititaliaq qilanaarpoq.
Aalisarsinnaanermit akuersissut ukiup siuliani tamakkiisumik atuisimanermik piumasaqaatitaqassaaq. Ataatsimiititalialli inatsit sakkortugalugu oqariartuuteqarmat inatsit sakkukillineqarpoq taamaalillunilu aalisartoq arlaatigut ajutooruni aalisarsinnaajunnaarlunilu taava aalisarsinnaanermut akuersissutini annaassanngilaa.
Inatsisip pingajussaanneerneqarnerani 27-init akuerineqarpoq, marlulli taaseqataanatik.
