Sineriatsinni ajornartoortoqarnerani paatsuungasoqartoq: Aalisartut sineriammiittut pisaminnik tunitsisinnaasut
Nuuk matoqqavoq innuttaasullu aallaqqusaanngillaq. Aamma eqimattani qulini amerlanerusuni katersuuteqqusaanngillat.
Nunattali sinnerani malittarisassat taama sukangatiginngillat. Taamaakkaluartorli innersuussutit nutaat innuttaasut akornanni paatsuussutigineqartut, politimesterip, Bjørn Tegner Bayip tusagassiortunik katersortitsinermi oqaatigaa.
Aalisartut paatsuussuteqartut ilagaat. Taakku illoqarfimmiit illoqarfimmut imaluunniit nunaqarfimmiit nunaqarfimmut pisaminnik tunisiartorsinnaappat?
AAMMA ATUARUK Coronavirus: Inuk Hostelip millionip affaa annaareerpaa
Taamaaliorsinnaanngikkunimmi akiligassaminnik ineqarnerminnillu akiliisinnaanngillat.
Akissutissarli naatsoq imaappoq, aalisartut Nuummi najugaqanngikkuni – taava ajunngilaq, Bjørn Tegner Bay oqarpoq.
Taamaammat aalisartuuguit assersuutigalugulu Uummannamut tunitsisaruit – taama taamaaliuinnarsinnaavutit.
Inuiaqatigiinnut pingaarutilinnik suliffeqartut
Illoqarfiit pingarnersaat eqqarsaatigissanngikkaanni inuit 100-init amerlanerusut katersuuteqqusaanngillat – aamma illoqarfiit illoqarfiit nunaqarfiillu akornanni angalaneq inassutigineqanngilaq. Inuiaqatigiinnili pingaarutilinnik suliffeqartut angalanissaat ajunngilaq.
Aalisartullu angalasinnaasut, Bjørn Tegner Bay naliliivoq.
Inuitaqatigiinni pingaarutilinnik suliffeqartut tassaasinnaapput, politiini, Issittumi Sakkutooqarfimmi sulisut, angerlarsimaffimmi ikiortit. Kisianni aamma maskinalerisuusinnaavoq innaallagiaqarfimmik suliaqartussaq. Imaluunniit telemi teknikeri attaveqaatinik qulakkeerisussaq.
Tamannali Nuup avataani aalisartunut aamma atuuppoq.
... taavalu Nuummiittut
Nuummi aalisartut sumiiffinnut allanut tunitsiartorsinnaanngillat.
Kapisilinnit aalisartoq Nuummut tunitsiartorsinnaanngilaq – aamma Paamiuni aalisartoq Nuummut tunitsiartorsinnaanngilaq.
AAMMA ATUARUK Nuummi inerteqqutit nutaat: 1500 koruunimik akiligassinneqarsinnaavutit
Kilisaatit illoqarfiit pingaarnersaannut usingiartikkiartorsinnaavoq aallaqqillunilu. Inuttalli nunamut niussagunik tamanna ajornakusuussaaq.
- Inuit Nuup avataaniittut tunillanneqartikkusunngilagut. Taamaammat Nuummut niusoqaruni taakku Nuummiit aninngikkallassapput, Bjørn Tegner Bay oqarpoq.
Naalakkersuisut inuussutissarsiuteqartunut ikiorsiissutinik arfininngornermi aqagu saqqummersitsissapput.