Simonsenip isornartorsiutaa Disko Linep eqqunnginnerarpaa
- Isumaqarpunga pitsaanngitsoq. Arlaannik pisoqassagaluarpat taava ilaasut kikkuuneri paasineqarnavianngillat, KANUKOKA-p siulittaasua Simon Simonsen oqarpoq.
Taama pasilliinini kommunimi sulisup Disko Linep angallataanik angalanermini maluginiarsimasaanik tunngavilersorpaa.
AAMMA ATUARUK Disko Line aaqqiagiinngissutaasoq
Disko Linep piginnittuata Jørgen Nielsenip isornartorsiut eqqunnginnerarpaa, piginneqatigiiffiummi angalanissamut elektronikkikkut inniminniisarnerit, Qeqertarsuup Tunuani atukkani, kujataani aamma atortarpai.
- Ilaasunik nunami umiarsuarmilu allattorsimaffeqarpoq. Elektronikkikkut nalunaarsuisarpugut ilaasullu tamaasa nalunaarsortarpagut. Allattorsimaffiit issoraanerani misissorneqartarput allaffimmullu nalunaarutigineqartarlutik, Disko Linemi piginnittoq Jørgen Nielsen allappoq, erseqqissaatigalugulu nalunaarsueriaaseq taama ittoq Qeqertarsuup Tunuani ukiuni qulini kingullerni atornera pitsaasuusimasoq.
Umiartornermik aqutsisoqarfik KNR-imut ilisimatitsivoq ilaasut aqqinik allattorsimaffeqarnissaq piumasaqaataanngitsoq.
AAMMA ATUARUK Disko Linep inissilluarnissaanut periarfissinneqarli
AAMMA ATUARUK Disko Line iluarsiissuteqassalluni neriorsuisoq
Ilaasut angallassisunut ilungersorlutik saaffiginninniartartut, Simon Simonsenip aamma isorinnissutigaa.
- Assersuutigalugu Mittarfeqarfimmut saaffiginnikkaluaraanni akisinnaaneq ajorput, Disko Linemut attuumassuteqannginnerarlutik. Taava Disko Linemut timmisartoq pillugu paasiniaagaanni, Air Greenlandiunnginnertik tunngavilersuutigalugu ikiuisinnaannginnerartarput. Tamakku ataqatigiissaarneqartariaqaraluarput, Simon Simonsen oqarpoq, ataqatigiissaarinerlu Naalakkersuisunit piumasarineqalertariaqartoq oqaatigalugu.
Jørgen Nielsenip erseqqissaatigaa kiffartuussinissamik isumaqatigiissutip naammassiniarnera suliassartaqaqisoq, tassungalu Mittarfeqarfiit, Air Greenland, Air Iceland taavalu aamma angallatsitsivik bilitsinik suliarinnittoq ilanngunneqartussaallutik.
- Angallassinerit allannguuteqartarneri pillugit isumaqatigiissutit kingulliit januaarip aallaqqaataani atuutilersussat siorna decembarip 30-ani atsiorpagut, Disko Line allappoq, nangillunilu:
- Periutsit isumaqatigiissummut peqataasuni assigiinngitsuni atuutilersinnissaat soorunami ullormit ataatsimit sivisuneruvoq.
