Simon Simonsen Inatsisartunit tunualerpoq
Simon Simonsen Inatsisartunit apriliip aallaqqaataaniit atuutilersumik tunuassaaq. Naalakkersuisunut ilaasortaasimasup Siumumeersup nammineerluni tamanna KNR-imut uppernarsarpaa.
Allattoq Andreas Wille
marsip 28-at 2019 12:09
Taassuma taamaatinnini uippakajaarnikuunerminik sivisuumillu napparsimanerminik, taavalu eqqissisimanerusumik inuuneqalerusulernerminik tunngavilersorpaa.
Simon Simonsen ilisimatitsivoq, tunuarnissamik qinnuteqaatini Inatsisartunit ullumi akuerineqartoq.
Simon Simonsen nuna tamakkerlugu poltikkimik suliaqarnera sivisunngilaq, 2018-imi majimi qinersinermi siullermik qinigaavoq.
Kisianni Kim Kielsenip naalakkersuisuini qaffaallappoq, Naalakkersuisut siulittasuanut tullinngorami taavalu ineqarnermut attaveqaqatigiinnermullu naalakkersuisuulluni.
Aammali kommunimi politikkimi misilittagaqarluartuuvoq, Kommune Kujallermi borgmesteriusimalluni, tassanilu ilaasortaaginnassalluni ilisimatitsivoq.
