Simon Simonsen pakatsivoq

Komunit aaqqissuuteqqinnissaasa ippassaq akuersissutigineqarneranut atatillugu, Qaqortumi borgmesterip, Simon Simonsenip, borgmestereqatini, Inatsisartunut ilaasortaasut, pakatsiffigai.

Kommunit aaqqissuuteqqinnissaat Inatsisartunut ilaasortat tamarmiullutik ippassaq akuersissutigaat, kommunit 18-it januaarip ulluisa aallaqqaataanni ukioq 2009-mi komunerujussuanngussapput sisamat. Borgmesterinit 18-iusunit 14-nit ullut 14-it matuma siorna piumasarigaluarpaat aaqqissuusseqqinnissaq ukiumik ataatsimik kinguartinneqassasoq. Tamannali Inatsisartunit qisuariarfigineqanngilaq, apeqqulluunnimmi oqallisigineqarani.

Simon Simonsen tamatumunnga ima oqarpoq:

- Soorunami pakatsivunga, tassami borgmesterit kommunaldiektørillu Københavnimi peqataasut tamarmik isumaqatigiillutik Naalakkersuisunut saaffiginnissuteqaraluarput siuartitsinissamik – qaammatinik sisamanik siuartitsinissaq pinnagu – immaqa qaammatinik arfineq-pingasunik kinguartitsinissaq kissaatiginartinneqarluni, neriuutigineqarmat suliassarpassuit piareersarnissaat piffissaqarluarluni ingerlanneqarnissaat kissaatiginartinneqarmat.

Apeqqutit assigiinngitsut iluamik akissutissartaqanngitsut suli, qularnartullu, amerlavallaartutut isigineqarmata suli kinguartitsinissaq kissaatigigaluarparput, Simon Simonsen oqarpoq.

Simon Simonsenip minnerunngitsumik pakatsissutiginerarpaa, kommunit aaqqissuuteqqinnissaat ippassaq akuersissutigineqarmat borgmesterit Inatsisartunut ilaasortat arlaannalluunniit qisuarianngimmat.