Simon Simonsen: Josef Motzfeldt isornartorsiuimmat uggornaqaaq
- Isumaqarpunga uggornartuusoq inatsisartunut ilaasortaq Josef Motzfeldt, IA, naalakkersuisuni ilaasortaajunnaareerami oqartussaassuseerutereerluni Air Greenland-ip naammaginanngitsumik ingerlatsinera uparuarmagu, taama allappoq Simon Simonsen, Qaqortumi borgmesteri.
Ukiuni 15–ini Narsarsuarmi takornarialerisup Jacky Simoud-ip sapaatip akunnera kingulleq Air Greenland isornartorsiorpaa juulimi aggustimilu, septembari ilanngunnagu pilersaarusiorsimammagit, naak takornariarumasut Danmarkimiit Spaniamiillu ukiuni arlaqalersuni imaaginnavissimagaluartut.
Josef Motzfeldt allappoq, Air Greenland-ip pilersaarutaa kiffartuunniakkanut uppernanngitsuusoq, taqqavanilu takornarialerisunik qanimut ataqatigiissumik suleqataaqqullugu inallugu.
- Ukiuni arlaqalersuni kommunit pingasuulluta kisimiillutaluunniit allakkat aamma atorlugit saaffiginnissutigisartakkavut qisuariarfigineqarneq ajorput, Qaqortup borgmesteria Simon Simonsen taama aamma ilaatigut allappoq.
Taamatut oqallinnissamut akuujumannginnini Josef Motzfeldtip ullaaq manna nalunaarutigaa.