Simon Olsen nassuiaateqarumanngilaq

Simon Olsen Inatsisartut aningaasaqarnermut ataatsimiititaliaani siulittaasunngornini pillugu nassuiaateqarumanngilaq.

Aalisarnermut piniarnermullu naalakkersuisuusimasup naalakkersuisunit tunuarnerata kingorna inatsisartuni Aningaasaqarnermut Ataatsimiititaliami ilaasortassanik qinersisoqarpoq. Tamanna pissuteqarpoq Simon Olsen-ip ataatsimiititaliami siulittaasunngorusunneranik, siulittaasumut unammillertaa Ruth Heilmann oqarpoq.

Siulittaasussarsiornermi marloriarluni taasisoqarpoq. Siullermi Ruth Heilmann Simon Olsenilu naligiipput, makitsisoqarnissaanillu Ruth Heilmannip siunnersuutaa ilalerneqanngimmat taaisoqaqqppoq, Simon Olsenilu amerlanernik taaneqarpoq.

- Oqartoqarpoq uanga siulitaasunngortariaqartunga. Simon Olsenilli siulittaasunngornissi anneruniutigaa, taamaanngippat Siumuminngaanniit igitaasutut misisigisimassagami, Ruth Heilmann tallimanngormat nassuiaavoq. Siulittaasussarsiornermi pisimasut Simon Olsenip nassuiaateqarfigiumanngilai.

- Partiip iluani pisut partiip iluanniissapput, taamaattumik oqaaseqarfigerusunngilakka, Simon Olsen erseqqissaavoq.

Siumup immikkoortortaqarfiata Ilulissaniittup Simon Olsenip siulittaasunngortinneqarnera Inatsisartuni ilaasortanit Siumumeersunit kiisalu Siumup siulittaasuannit taamaaliorneq annertuumik naliliinerlunnerarlugu.

Siumut Inuusuttaasa Suleqatigiiffiani, SIS-imi, siulittaasup tullia Laarseeraq Berthelsen aamma isumaqarpoq Aningaasaqarnermut Ataatsimiititaliami siulittaasussamut Siumup gruppeata qinersinera siorasaarinertalimmik ingerlanneqarsimasoq akuerineqarsinnaanngitsoq, tamannalu Siumup qinigaatitaasa ataqqinassusiannik innarliinerusoq.