Simon Olsen ikinnerussuteqarluni siulittaasunngorpoq

Naalakkersuisunut ilaasortaasimasoq Simon Olsen, Siumut, sapaatip akunnera kingulleq qaangiuppoq aningaasaqarnermut  ataatsimiititaliamut siulittaasunngormat, Sermitsiarli ullumi saqqummertoq malillugu ataatsimiititaliami tassani Siumukkormiunit sallersaatitaalluni qinigassaasimanngikkaluarpoq  Siumukkormiummi pineqartoq pillugu aalajangiisussat Ruth Heilmann sallerpaatissimagaluarpaat, tassa Siumukkormiut amerlanerit aningaasaqarnermut ataatsimiititaliamut Ruth Heilmann piukkunnerusimagaluarpaat, Sermitsiaq naliliivoq.

Sermitsiamili aamma allaaserineqarpoq Simon Olsen sioorasaarisimasoq aningaasaqarnermut siulittaasunngunngikkuni Siumumit aniniarluni, taamaammallu Ruth Heilmann amerlanernit toqqagaagaluarluni ataatsimiititaliamut siulittaasussatut toqqagaanngitsoorsimasoq.

Siumulli inatsisartuni gruppiata siulittaasua, Otto Jeremiassen ullaaq radioavisimut oqarpoq Siumukkormiut aningaasaqarnermut ataatsimiitititaliamut ilaasortanngornissamut soqutiginnittut qinigassanngortereersut soqutiginninnerat pisinnaasaallu oqaluuserereerlugit taasinermi Simon Olsen amerlanerussuteqartunit toqqarneqarsimasoq, tulleralugu Ruth Heilmann Ole

Thorleifsenilu taasisukinnerusimasoq, Siumukkormiunimmi aningaasanut ataatsimiititaliamut amerlanerussuteqartumik toqqagaq ataatsimiititaliamut siulittaasuusussaavoq.
Otto Jeremiassenip Sermitsiami allaaserisaq eqqumiigaa, aamma Simon Olsenip aningaasaqarnermut ataatsimiititaliamut siulittaasunngunngikkuni Siumumit tunuarnissaminik sioorasaaraluni siulittaasunngorniarsimanera suminngaaneersoq nalunerarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat