Simon Lyngep aqqutit nutaat atorniarpai

35.000 dollarsinik, qallunaat aningaasanngorlugit 200.000 koruuninik, katersinissaminut assigiinngitsunik akissarsisitsissalluni Simon Lynge neriorsuivoq - apeqqutaalluni aningaasanik qanoq amerlatigisunik tuniserusuttoqarnersoq - qujamasunnermiit asanninnermut, nuuteeraliamini atsiorsinnaanerarpoq, Skype atorlugu tusarnaartitsinissaminik neqerooruteqarpoq, nammineq ujamiliaminik tunisiumavoq, allaallumi angummi, Karl Lyngep, peqataaffigisaanik Qaqortup eqqaani piniariarsinnaanermik neqerooruteqarluni.

Facebookimi quppernermini Simon Lynge ullumi nalunaarpoq, tapersersortissaminik nalunaaquttap-akunneri 24-t matuma siorna aallartikkami 2.621 dollarsit pissarsiarereersimagini, tassa nuuteeraliassami saqqummersinnissaanut aningaasartuutissami 7 procentii.

Simon Lyngep oqarnera naapertorlugu, nuuteeraliani siulleq, The Future, saqqummersikkamiulli, nutaanik arlalinnik ukiuni arlalinni erinarsuusiorsimalluni. Taakkunannga aqqaneq-marluk saqqummersitassaani toqqarneqassapput. Nuuteeraliaata juunimi saqqummernissaa ilimagineqarpoq.